Norgga Kvenaid lihtu jođiheaddji Hilja Huru reagere go Stáhta ii hálit ásahit duohtavuođakommišuvnna kvenaid ja sápmelaččaide.
Norgga Kvenaid lihtu jođiheaddji Hilja Huru reagere go Stáhta ii hálit ásahit duohtavuođakommišuvnna kvenaid ja sápmelaččaide.
– Jus stáhta álggaha dakkár kommišuvnna mii duođašta dáruiduhttima váikkuhusaid, de šaddá vuordámuš ahte doaimmat biddjojit johtui, čuožžu dokumeanttas.
Viidásit čuožžu maid ahte lea buoret jus Sámediggi ieš álggaha kommišuvnna, ja doaimmaha dan, stáhta haga.
– Das lea ovdamunni ahte eai šatta vuordámušat doaimmaide.
Reagere
– Duohtavuođakommišuvdna ii galgga ásahuvvot vai kvenat besset sierragáibádusaid ovddidit. Dan orru Stáhta ballame. Kommišuvdna galgá ásahuvvot vai duohtavuohta sáhttá čilget, makkár váikkuhusat dáruiduhttimis leat leamaš sápmelaččaide ja kvenaide. Ja movt buoridit daid váikkuhusaid, cealká Norgga Kvenaid lihtu jođiheaddji Hilja Huru preassadieđáhusas.
Son čállá dokumeantta lea duođaštussan ahte eiseválddit eai ipmir makkár váikkuhusat dáruiduhttimis leat leamaš kvenaide.
– Dát duođašta dan garra vuostehágu eiseválddiid bealis álggahit doaimmaid kvenaide. Dat hehtte kvenaid vejolašvuođa gáhttet min giela ja kultuvrra, ja dan ovddidit boahttevaš buolvvaide, čállá Huru.
– Mii oaidnit kvena mánáid. Máŋgga suohkanis ii leat kvenaoahpahus oba ge. Oaidnit maid man unnán dáhttu lea stáhta kanálii oažžut kvena sáddagiid.
– Dá lea manne mii dárbbašit Duohtavuođakommišuvnna, dat sáhtášii čuvgehit movt sápmelaččat ja kvenat vásihedje dáruiduhttima, ja movt dat lea min servodaga hábmen.
