Odne álggii diggi 30 jahkásaš dievddu vuostá gii lea áššáskuhtton go galgá leat seksualálaččat rohcošan 17 mánáin Romssas.
Odne álggii diggi 30 jahkásaš dievddu vuostá gii lea áššáskuhtton go galgá leat seksualálaččat rohcošan 17 mánáin Romssas.
Rohcošeamit galget leat dáhpáhuvvan dan áigodagas go dievdu barggai mánáidgárddis 2008:is gitta mannan miessemánu rádjái. Dan rájes lea dievdu leamaš háldogiddagasas politiijaid luhtte.
Diggi galgá bistit 12 beaivvi Davvi-Romssa diggegottis. Áššáskuhttineiseváldit leat sihtan dievddu doallat rádjogiddagasas čađat. Áššáiduhtton dievdu galgá odne ja ihttin, gaskavahkku, buktit iežas čilgehusa rievttis.
Dievdu lea maid áššáskuhtton go galgá leat máŋgga háve seksualálaččat rohcošan golbma máná vuostá geat leat vuollel 10 jagi ja guovtti máná vuostá geat leaba vuollel 14 jagi boarrásat. Dievdu dovddastii belohahkii sivalažžan dáidda čuoččuhusaide.
Lassin galgá son lága rihkkon seksualálaš daguiguin njealji máná vuostá, ja seksualálaš láhttenvugiin rihkkon viđa máná vuostá. Áššáskuhtton dievdu dovddastii iežas sivalažžan juohke čuoggás, earret ovtta dáhpáhusas áššáskuhttimis.
Son lea maid áššáskuhtton go galgá leat vurkkodan govaid ja filmmaid mat čájehit seksualálaš daguid mánáid vuostá dahje mat čájehit mánáid seksualálaš oktavuođas. Áššáskuhtton dievdu dovddastii sivalažžan buot čuoggáide.
Dán čállá Nordlys aviisa.
