Beassášfestivála čalmmustahttá 30. SGP-gilvvuid erenoamáš vugiin.
Beassášfestivála čalmmustahttá 30. SGP-gilvvuid erenoamáš vugiin.
Sámi Grand Prix gilvvuid oktavuođas leat ilbman olu sámi lávlagat, ja muhtimat dain leat šaddan duohta klasihkkárin sámi musihkkamáilmmis.
Dán jagi almmuhuvvojit mutimat dáin ođđa hámis, ja soaitá ge justa du oiddotlávlla gullot ođđasit.
– Sámi musihkkahistorjá ealáskahtto ođđa hámis
Sámi Musihkkafestivála čalmmustahttá oainnat Sámi Grand Prix (SGP) 30. gilvvuid erenoamáš bihtáin.
– Sámi musihkkahistorjá ealáskahtto ođđa hámis go nuorra, čeahpes musihkkabuvttadeaddjit leat ožžon erenoamáš barggu justa ovdalaš beassážiid, namalassii dulkot SGP luđiid ja lávlagiid mat leat almmuhuvvon 1990-2000 áigodagas, čállá festiválajođiheaddji Ken Are Bongo preassadieđáhusas.
Ain bargamin
Prošeakta álggahuvvui skábmamánus diibmá, muhto bođii albmaládje johtui birrasii mánu áigi.
– Min golbma musihkkabuvttadeaddji válde hástalusa ja ovddasráđiid hárjánan musihkkabuvttadeddjiin Morten Petterseniin, guhte lea bures bagadan sin, leat buvttadan juoga mii lea áibbas erenoamáš gudnejahttin dihtii SGP, čállá Bongo.
Sii leat ain bargamin bihtáiguin ja prošeavttain, muhto dat galgá gárvánit beassášfestivála áiggis Guovdageainnus, ja galget ovdanbuktot vuosttaš geardde guhkesbearjadaga, cuoŋománu 19. beaivvi.
Čájehit ođđa buolvva
– Dakkár prošeavtta eat leat goassege oaidnán Sámis, rábmo festiválajođiheaddji.
Bongo čállá ahte sihke festivála, musihkkabuvttadeaddjit ja artisttat leat njuiken njuolga prošektii.
– Mii áŋgiruššat čájehit ođđa buolvva sámi musihkkadahkkiid.
Musihkkabuvttadeaddjit prošeavttas leat Ivan Buljo, Anthoni Hætta ja Esben T. Andersen, ja Sámi Musihkkafestivála Facebook-siiddus lea jo vejolaš beassat gullat oasáža bihtáin maid áigot ođđasit ovdanbuktit.