Ođđa mánáidfilmma lea vejolaš oaidnit buot Norgga kinoin.
Mánáidfilbma «Bovttášvárri – Láhppon monni» čájehuvvo vuosttaš háve Norgga kinoin skábmamánu 3. beaivvi rájes, oktanaga filmma Norgga vuosttaščájálmasain. Duottar Studio Guovdageainnus lea dubben filmma davvisámegillii.
– Mii leat nu ilus go mii fas sáhttit fállat sámegielat filmma min mánáide, dadjá Internašunála Sámi Filbmainstituhta direktevrra Anne Lajla Utsi preassadieđáhusas.
Buot kinot Norggas sáhttet fállat čájehit filmma davvisámegillii, seamma láhkai go fállet dan dárogielat filmma.
– Jos du báikkálaš kino ii leat vel almmuhan Bovttášvári čájeheami, de sáhtát dáhttut sin čájehit dán. Dál, go lea vejolašvuohta fállat sámegielat filmma oktanaga dárogielat filmmain, mii ávžžuhit Norgga kinoid maiddái čájehit sámegielat filmma mánáide. Buot kinoin Norggas lea vejolaš čájehit filmma, dadjá Utsi.
Ávvučájáhus Guovdageainnus
«Bovttášvárri – Láhppon monis» lea ávvučájáhus Guovdageainnus sotnabeaivvi skábmamánu 5. beaivvi gos buot mánát leat bures boahtimat, ovttas jietnaneavttáriiguin. Olu mánát ja ollesolbmot leat leamaš mielde dubbemin filmma davvisámegillii.
– Jietnaneavttárat leat dahkan nu buori barggu. Filbma lea somás mánáidfilbma mas leat olu lávlagat, mii heivege nuoramusaide. Dán jagi lea maid Inga Marja Sarre ovttas Duottar Studioin ja Sámi nuoraidlávddiin doallan jietnaneaktinkurssa mánáide ja nuoraide, ja dás mii oaidnit dál buriid bohtosiid, dadjá direktevra.
