-Almmuhus-
OĐĐASAT –  Doarjut Guovdageainnu giđđaloddema

 Doarjut Guovdageainnu giđđaloddema

-

-

Finnmárkkuopmodat (FeFo) deattuha, ahte sii dorjot Guovdageainnu giđđaloddema, go dihtet bures makkár sávaldagat báikkálaš olbmuin leat.

– Aiddo dát lea leamaš guovddážis go FeFo lea buot gulaskuddanvuoruin dorjon Guovdageainnu giđđaloddema – ja lea áinnas dorjon stuorát bivdoeriid juos fal čáhceloddenálit girdet dan, dadjá FeFo gulahallan- ja servodatjođiheaddji Robert Greiner preassadieđáhusas. Seammás son deattuha, ahte Birasdepartemeanta  lea mii mearrida rámmaid giđđaloddemii – iige FeFo.

FeFo gulahallan- ja servodatjođiheaddji Robert Greiner. Govven: FeFo
FeFo gulahallan- ja servodatjođiheaddji Robert Greiner. Govven: FeFo

Buorre ovttasbargu suohkanin

Greiner čállá ahte FeFo lea álo leamaš miehtemielat giđđaloddemii nu go dat lea dál.

– Ii dat leat dušše báikkálaš vuoigatvuohta, muhto maiddái kultuvra. Dát vuoigatvuođat leat nannejuvvon Finnmárkkulágas, ja daid galgá FeFo earenoamážit vuhtii váldit. Mii vásihit juohke jagi buori ovttasbarggu Guovdageainnu suohkaniin giđđaloddema hárrái, dadjá FeFo gulahallan- ja servodatjođiheaddji. 

Álbmotčoahkkimiid lágidit

FeFo gulahallan- ja servodatjođiheaddji Robert Greiner maid lohká, ahte jus  šaddá dárbu, de FeFo áinnas atná gažadanguorahallamiid dahje doallá álbmotčoahkkimiid vai beassá olbmuid oaiviliid gullat ja diehtit.

– Mii doalaimet álbmotčoahkkima ovdal rievssatbivddu Guovdageainnus diibmá – vai bivdu nu bures go vejolaš doahttala báikegotti sávaldagaid, buohtastahttá Greiner.

- Advertisement -
-Almmuhus-