Sámediggeráđđi lea juolludan 200 000,- ruvnnu Internašunála Sámi Filbmainstituhttii, ISFI AS buvttadeapmái ja čájáhussii ÁRRAN 360° – teknologiijaovddideapmái, hutkama ja dáiddalaš ođđaárvalusa arenai.
Mihttu lea ahte sámi ja eará eamiálbmogiid XR filmmat leat mielde njunnožis teknologalaš ovdáneamis, máilmmi ovddimus XR-teknologalaš birrasiin.
XR-buvttadeami márkan lea lassánan máilmmiviidosaččat ja jámma ráhkadit ođđa teknologiija. ÁRRANiin lea sámi filbmabuvttadeapmi njunnošis ovdánemiin, ja lea mielde ráhkadeamen ođđa vejolašvuođaid sámi dáiddáriidda ja filbmabuvttadeddjiide.
Dat čájehuvvo ahte lea stuora beroštupmi oaidnit ÁRRAN filmmaid ja XR buvttademiid riikkaidgaskasaččat, ja plána mielde galget sámi filmmat čájehuvvot Lübeckas, Malmøs, Londonis, Canadas ja USAs maŋŋel go leat čájehuvvon Venezias.
– ÁRRAN 360° lea áibbas ođđa ja earálágan vuohki gaskkustit sámi historjjá, myhtaid ja eallinvugiid. Illudahttá oaidnit mot ISFI dán prošeavtta bokte lea bures bargan rekruteret ja movttiidahttit sámi filbmadáiddáriid, lohká sámediggeráđđi Maja Kristine Jåma (NSR).
Juolludeapmi lea juolluduvvon ortnegis Ásahusovddideamis.
