Sámediggi lea juolludan 500 000 ruvnno doarjjan Peter Fossan Lakselvnesii ođasmahttit ja viiddidit iežas gáicanáveha.
Peter Fossan Lakselvnes lea Moskaluovttas eret ja lea ožžon oktiibuot 500 000 ruvnno doarjaga náveha viiddideapmái. Moskaluokta lea Romssa suohkanis, ja oasit suohkanis leat guovllut mat leat Sámedikki ealáhusdoarjagiid doaibmaguovllus, ja danne lea ge vejolaš addit doarjaga dán doibmii.
Lakselvnes čállá ohcamisttis ahte prošeavtta ulbmil lea lasihit buvttadeami, ja ahte go doaibmavejolašvuođat buorránit, de lea unnimusat seamma buorre ekonomiija doalus go dál lea. Náveha viiddideapmi attášii vejolašvuođa lasihit gáiccaid logu sullii 166 gáicii, ja mielkebuvttadeapmi livččii de 40 000 lihtara jagis. Gáiccaide šaddá maid buoret sadji návehis. Huksen álkida sakka roavvafuođđarbiebmama ja geahpeda beaivválaš barggu. Juoga mas lea buorre váikkuhus dearvvašvuhtii.
– Mii sámediggeráđis árvvusatnit buori bargodili ja dakkár doaimma mii lea ekonomalaččat ceavzil. Mii oaidnit ahte doaluid lohku eanandoalus njiedjá, ja dat lea šállošahtti. Danne lea deaŧalaš doarjut sin geat háliidit áŋgiruššat ja háliidit váikkuhit árvoháhkamii eanadoalus, dadjá sámediggeráđđi Berit Marie E. Eira (JSL).
