Sámediggeráđđi juolluda 144 000 ruvnno Háldi álbmotmeahcceguovddážii sin ođđa vuođđočájáhussii «Fantastiske Reisa».
Háldi álbmotmeahcceguovddáš lea Ráissa álbmotmeahci galledanguovddáš. Sámedikki doarjja galgá adnot guovddáža ođđa vuođđočájáhussii, mii galgá oainnusmahttit guovllu luonddu ja ávžži kulturhistorjjá.
Sámediggeráđđi sávvá ođđa čájáhusa veahkkin oainnusmahttit Ráisávžži sámi historjjá vel eanet.
– Ráisávži lea dehálaš sámi guovlu. Mii sávvat álbmotmeahcceguovddáža ođđa čájáhusa čájehit ávžži sámi historjjá ja oainnusmahttit dálá sámi leahkima guovllus, dadjá sámediggepresideanta Silje Karine Muotka (NSR) pressadieđáhusas.
Čájáhus «Fantastiske Reisa» máksá oktiibuot 2,6 miljovnna ruvnno, ja 144 000 ruvdnosaš doarjja juolluduvvo Sámedikki regionála ovddidanprošeavttaid doarjjaortnegis.
Jus dán ortnegis galgá oažžut doarjaga, de ferte prošeakta ruhtaduvvot ovttas gávpotsuohkaniin dahje fylkasuohkaniin mainna Sámedikkis lea ovttasbargošiehtadus. Dan oktavuođas doarju maiddái Romssa ja Finnmárkku fylkkasuohkan prošeavtta ruđalaččat.
