Sámediggeráđđi lea juolludan 876 500 ruvnno doarjaga 2023 doarjjaortnega bokte Árbevirolaš máhttu vuođđooahpahusas, man ulbmil lea ahte skuvllain, gos leat oahppit geat ožžot sámegieloahpahusa, leat doaimmat mat gusket sámi árbevirolaš máhttui.
– Lea dehálaš ahte skuvllat, gos leat oahppit mat lohket sámegiela, oahpahit ohppiidasaset sámi árbevirolaš máhtu, ja ahte oahppit besset čiekŋudit fáttáide ja geavahit daid fágaid rastá geavatlaš searvama bokte bargui, dadjá sámediggeráđđi Berit Marie P. E. Eira (Johttisápmelaččaid Listu) preassadieđáhusas.
Sámi siida AS, Álttás, lea ožžon 130 000 ruvnno prošektii Árbevirolaš doaimmat mat gusket boazodollui, njálmmálaš muitalanárbevieruide, luohtái, verddestallamii ja hearggástallamii. Prošeavtta váldoulbmil lea álggahit ovttasbarggu skuvllaiguin ja geavatlaš doaimmaid bokte čalmmustahttit ja gaskkustit árbevirolaš máhtu vuođđoskuvlaohppiide. Guhkesáiggi mihttu livččii ásahit bissovaš fálaldaga buot vuođđoskuvlaohppiide Norggas.
Guovdageainnu suohkan, Guovdageainnu skuvla, lea ožžon 110 000 ruvnno prošektii Duodjeárbevierut, man ulbmil lea seailluhit ja viidáset fievrridit árbevirolaš duoji nuorat buolvvaide atnubiergasiid ráhkadeami bokte. Duodji lea sápmelaččaid árbevirolaš giehtadáidda.
Mátta-Várjjaga gielda, Girkonjárgga skuvla, lea ožžon 100 000 ruvnno prošektii «Duodji i skolen», man ulbmil lea nannet ja ovddidit ohppiid ja bargiid duodjegelbbolašvuođa, sámi giella- ja kulturipmárdusa, nannet ohppiid sámi identitehta ja gullevašvuođa sámi kultuvrii ja gillii, ja nannet ja ovddidit duoji vai šaddá lunddolaš oassi dáidda- ja duodjefága oahpahusas.
Tråanten tjïelte lea ožžon 100 000 ruvdnosaš prošeaktadoarjaga doallat julevsámi čoagganemiid. Prošeavtta mihttu lea nannet julevsámegiela iešguđet doaimmaid bokte main árbevirolaš máhttu deattuhuvvo. Prošeavttas galget oahppit beassat geavahit iežaset giela ja kultuvrra das mii guoská luohtái, bibmui ja duodjái.
Oslo suohkan, Oahpahusasetáhta bokte, lea ožžon 50 000 ruvdnosaš prošeaktadoarjaga prošektii «Utvidelse og dybdelæring av tradisjonskunnskap og samarbeid med Sámi Siida i Alta». Prošeavttas galgá leat duodjebargobádji. Oahppit galget geavatlaš barggu ja bagadallama bokte oahppat iešguđet lágan duodjeteknihkaid. Prošeavtta mielas lea dehálaš heivehit geahččaladdamii, hutkanmoktii ja áŋgiruššamii.
– Lea earenoamáš somá go skuvllain dakkár gávpogiin nu go Oslos ja Tråantes lea vejolašvuohta fállat oahpahusa sámi árbevirolaš máhtus, dadjá Eira.
Čuovvovaš ohccit leat maid ožžon prošeaktadoarjaga juovlamánus 2023:
– Romssa ja Finnmárkku fylkkagielda, Davvi-Romssa joatkkaskuvla, lea ožžon 95 000 ruvnno prošektii Mearrasámi árbevirolaš kulturmáhttu, duddjon ja biebmovierut.
– Sámi joatkkaskuvllat, Kárášjohka ja Guovdageaidnu, leat ožžon 90 000 ruvnno prošektii Árbemáhtu doaimmat ja logaldallamat ohppiide ja nuoraide.
– Álaheaju suohkan lea ožžon 80 000 ruvnno árbevirolaš máhtu oahpahussii Gorravári skuvlla ohppiide.
– Romssa ja Finnmárkku fylkkagielda, Álttá joatkkaskuvla, lea ožžon 75 000 ruvnno prošektii Sjøsamiske mattradisjoner og sedvane.
– Kvænangen næringsfabrikk as lea ožžon 35 500 ruvnno doallat bargobáji Návuona mánáid- ja nuoraidskuvlla ohppiide: Viddas matfat, videreføring av samisk tradisjonsmat. Tradisjonskunnskap.
– Porsáŋggu gielda, Billávuona mearrasámi bajásšaddanguovddáš lea ožžon 11 000 ruvnno prošektii Birgejupmi i Porsangerfjorden.
