Olgeš ja Ovddádusbellodat leat beahttán Norgga áhčiid go leat unnidan áhččeeari.
Dálle go Olgeš ja Ovddádusbellodaga-ráđđehus álggahuvvui, de unnui áhččeearri vuosttaš geardde.
Dásseárvu lea nu ovdánan, ahte áhčit válljejit aŋkke guhkes permišuvnna, čuoččuhii Olgeš ovdal go unnidedje áhčiid permišuvnna njeljiin vahkkuin.
Dán sii dahke vaikko NHO, LO, Virke, Spekter, dutkit ja opposišuvdna várrejedje sin dan dahkamis.
Áhčit eai beasa mánáin mánástallat unnivuođarájis
– Boađus ráđđehusa politihkas lea ahte áhčiid permišuvdnaáigi mánáin lea garrasit niedjan. Ovdal go earri unniduvvui, de válde okta goalmmadasoasi Norgga áhčiin guhkit go logi vahkku áhččepermišuvnna. Dál čájehit NAV logut ahte dušše okta logi áhčis Norggas váldá guhkit go logi vahkku permišuvnna. Dát bohtosat eai surgehan earet go Olgeža ja Ovddádusbellodaga. Ráđđehusbellodagaid falleheapmi áhčiid rivttiide leat mánáiguin fárrolaga lea heittot mánáide, etniide, áhčiide ja servvodahkii. Go ná rievdá ruovttus ávvirovddasvástádus, de šaddá nissonolbmuide váddáseabbon gazzat oahpu ja buoridit bargoeallima, ja dievdoolbmuide šaddá váddáseabbon mánástallat. Sii šaddet guimmiin ja bargoaddiin šiehtadallat jus háliidit mánástallat. Boađus dás lea ahte Norga hehtte dásseárvvu ja mánát masset vejolašvuođa oažžut lagas oktavuođa goappaš váhnemii mánnávuođa rájes, čállá Bargiidbellodaga ráđđeaddi Siri Storstein Hytten preassadihtui maid lea sadden Ávviri.
Erna lea behtohallan
Erna Solberg vástidii Bargiidbellodaga čuoččuhussii ja NAV ođđa loguide ahte son lea beahtahallan Norgga dievdduide, muhto son lea vel eanet beahtahallan iežas dihte ja su iežas dálá politihkkii.
Etniid ja áhčiid dásseárvu
– Erna lea hehtten ovtta dáin buoremus politihkalaš veahkkeneavvuin maid mii lea ásahan Norggas. Dát permišunortnet lei doaibman juste nu movt lei meinejuvvon, ja lea nannen máná ja áhči oktavuođa, ja lea maid lokten dásseárvvu eatni ja áhči gaskkas sihke bearraša oktavuođas ja bargoeallima oktavuođas. Ledje hui unnán áhčit geat válde permišuvnna ovdal 1993, muhto go áhčiidearri ásahuvvui Gro Harlem Brundtland ja Bargiidbellodaga stivrra vuolde, de dát rievddai. Juohke háve go Stoltenberg-ráđđehus lasihii vahkkuid áhčiidearrái, de válde eambbo ja eambbo áhčit permišuvnna vai besset mánástallat, čállá Hytten.
– Muhto Olgežii ja Ovddádusbellodat eai beroštan das ahte dát doaibmabidju lei nu bures lihkostuvvan; dát ii heiven sin ideologiijii, mas válljenfriddjavuohta báhpira alde lea deháleabbo go válljenfriddjavuohta praksisis, loahpaha Hytten.
