Dán jagi leat biebmohattit divron eambbo go dábálaččat.
Hattit biepmuin- ja alkoholakeahtes juhkamušain divro 1,7 proseanttain mánus, geassemánus dán jagi. Dat divro 5,0 proseanttain 2021 geassemánus, 2022 geassemánnui. Dat biepmut mat divro eanemusat dien áigodagas ledje bierggut, láibbit ja eará gordnegálvvut. Diekkár rievdadusat eai leat dábálaččat.
– Biebmohattit geassemánus divro eambbo go dat dábálaččat lávejit. Jus geahččá dan obbalaš divruma ja man stuora olggosgolut buvttadeddjiin leat dal, de eai hirpmáhuhtte dákkár logut, dadjá Jarle Hammerstad, jođiheaddji suorgepolitihkas Virkes.
Ukraina soahti váikkuhan
Energiijahattit divrudit dan obbalaš konsumahaddeindeaksa. Das lea maid váikkuhus biebmohattiide.
– Duvttat, fievrrideamit ja erenoamážit energiija, leat divron daid maŋemus mánuid, erenoamážit maŋŋel Ukraina soađi. Loahpaloahpas váikkuhit dát golut hattiid biepmuin ja juhkamušain, dadjá Hammerstad.
