Lávvordaga áigot Hámmárfeasttas vuosttaldit dan go Birasdirektoráhtta attii lobi Nussirii ruvkebázahusaid gurret Riehpovutnii.
Lávvordaga áigot Hámmárfeasttas vuosttaldit dan go Birasdirektoráhtta attii lobi Nussirii ruvkebázahusaid gurret Riehpovutnii.
Nussir ráhkada 50 000 tonna veaikekonsentráhta juohke jagi eananvuoldoaimmain. Dat mielddisbuktá dárbbu doalvut eret 400 000 tonna geđggiid main ii leat metálla, čállá akšuvdnajoavku Facebookas «Politisk demonstrasjon mot vedtatt tillatelse til dumping i Repparfjorden» (Sám: Politihkalaš vuosttaldeapmi Riehpovutnii gurret bázahusaid).
Visot šattut ja eallit jávket
Lobis, man Birasdirektoráhtta lea sádden, čuožžu «Dat stuorámus negatiiva čuohcan birrasii lea ahte 8 njealjádaskilomehter (10-15 proseantta) Riehpovuonas geavahuvvo ruvkebázahusaide. Visot šattut ja eallit jávket dan báikkis go ruvkebázahusat luitojuvvojit mearrabodnái».
Birasdirektoráhtta gáibida Nussiris jahkásaš rapportta mas muitaluvvo maid sii barget nu ahte bázahusat geavahuvvojit eará doaimmaide, vai čađat galgá unnidit geađgebázahusaid ja luoitinmássaid maid bálkesta.
Lea nu ollu eahpesihkarvuohta dán áššis, oaivvilda akšuvdnajoavku. Hámmárfeastta Sosialisttalaš Gurutbellodat (SG) lea sádden váidaga Birasdepartementii, ja háliidit stuorát váikkuhusguorahallamiid ovdal go ruvkedoaibma álggahuvvo.
Demonstrašuvnna lágidit Hámmárfeastta SG, Fálesnuori SG ja Finnmárkku SG, ja eará bellodagat ja organisašuvnnat leat maid vuolgán fárrui doarjut akšuvnna, čállá akšuvdnajoavku Facebookas.
Sáhkavuorus leat:
Ingrid Petrikke Olsen, Hámmárfeastta SG
Torulf Olsen, Bivdi – Mearrasámi Guolástan- ja bivdosearvi (Sjøsamisk Fangst og Fiskeriorganisasjon)
Annie Henriksen, Luonddugáhttenlihttu
Johnny Ingebrigtsen, fylkkadiggeáirras SG/ Fisker
Kirsti Bergstø, stuoradiggeáirras SG
Kamilla Elene Samuelsen, Natur og Ungdom
Christina Henriksen, sámediggeáirras NSR ja SáB
