Čakčamánu 1. beaivvi rájes leat mánáidsuodjalanbálvalusat ovttastahttojuvvon Unjárgga ja Deanu gielddas. Dát lea boađus digaštallamiin gielddaid ovttastahttima birra.
Unjárga ja Deatnu leat šiehtadan ásahit oktasaš gielddaidgaskasaš mánáidsuodjalusbálvalusa.
Ovttasbargu organiserejuvvo hálddahuslaš oktasašbargguiguin gos Unjárgga gielda lea guossoheaddjigielda.
Bálvalusa váldokantuvrra lea Unjárgga gielddas, Ráđđevisttis, ja Veahkkebálvalusas kantuvralanjat Deanus.
Gieldareforpma ságastallamat
Deanu gieldda sátnejođiheaddji Frank Ingilæ muitala maŋŋel gieldareforpma ságastallamiid das ahte galget go Deatnu ja Unjárgga gielda ovttastahttojuvvot, de leat sii oaidnán vejolašvuođa ovttasbargat bálvalusain maid sii fállet gieldda ássiide.
– Mánáidsuodjalanbálvalus lea hui dehálaš bálvalus buot gielddaide miehtá Norgga. Dat mii lea hástalus lea ahte leat hui moattis geat barget mánáidsuodjalanbálvalusas ja gielddat dárbbašit olbmo geas lea gealbu dán fágasuorggis, dalle leat mii oaidnán oktan Unjárgga gielddain ahte livččii ávkkálaš ovttasbargat dán bálvalusas, nu ahte mii oažžut buoret ja nannosit fágabirrasa mánáidsuodjalanbálvalusas min guovtti gielddas, dadjá Deanu gielda sátnejođiheaddji Frank Ingilæ.
Soahpan ovttasbargat
Deanu ja Unjárgga gielddastivrrat leat soahpan ovttasbargat mánáidsuodjalanbálvalusas.
– Gielddastivrrat Deanus ja Unjárggas leat soahpan ovttasbargat interkommunála mánáidsuodjalusas mas Unjárgga gielda lea guossoheaddjigielda mánáidsuodjalanbálvalusas. Dát ii leat erenomáš, muhto lea okta dain positiiva čuozahusain maid kránnjáságastallamat leat dagahan gaskal Deanu ja Unjárgga gieldareforpma ektui. Ságastallamiin oinniimet ahte dát lea okta dain čuoggáin main mii sáhttit bargat ovttas. Earet go čáskit oktii gielddaid, de sáhttit mii baicce ovttasbargat máŋggain beliin ja dan mii dahkat iešguđetge guovlluin, dadjá Deanu gieldda sátnejođiheaddji Frank Ingilæ.
Unjárgga gielda galgá guossoheaddjigieldan organiseret guktuid gielddaid oktasaš mánáidsuodjalanbálvalusa.
Guossoheaddjigielddas lea ovddasvástádus hálddašit ja doibmet ođđa bálvalusa, ja mánáidsuodjalusbálvalus lea hálddahuslaččat organiserejuvvon sierra doaibman.
