Dálkkádat- ja birasdepartemeanta mearridii njukčamánu 31. beaivvi ahte ii rahppo dán geasi ge luossabivdu Deanučázádagas. Lea goalmmát jahki go luossabivdu gildojuvvo dán čázádagas.
Dálkkádat- ja birasdepartemeanta dieđihii preassadieđáhusas ahte 2022 geasi ledje guhtta dan gávcci guovllus buot heajumus dilis. Jus johkasámi kultuvra galgá ceavzit, de lea dehálaš ahte luossanálit bállejit fas beassat julggiid ala vai šaddá badjelbáza maid sáhttá bivdit.
Gulaskuddamis leamaš
Dálkkádat- ja birasdepartemeanta sáddii njukčamánu álggus evttohusaid gulaskuddamii mo sáhtášii muddet Deanučázádaga guolástannjuolggadusaid 2023 bivdoáigodahkii. Earret eará evttohuvvui dás ahte ii rahppo luossabivdu dán čázádagas boahtte geasi. Evttohusas ledje maid smávit rievdadusat bivdonjuolggadusaide mat gusket čázádaga eará guollešlájaide go lussii ja guvžái, ja ahte Deanučázádaga guolástanhálddahus galgá oažžut válddi hálddašit ruoššaluosa bivddu bajábeale plánejuvvon ruoššaluosamearddi mii ceggejuvvo Sieiddásullos.
Eatnašat dorjo
Departemeanta oaččui olu gulaskuddanvástádusaid ja eatnašat dorjo dán evttohusa. Olusat čujuhit ahte luossanálit eai leat dan mađe laskan ahte daid sáhttá bivdit, ja maiddái ahte ráddjejuvvon luossabivdu sáhttá čuohcat luossanáliid laskamii. Gulaskuddanásahusat mat eai doarjjo dán evttohusa ja geat háliidit ráddjejuvvon bivddu, deattuhit man dehálaš lea seailluhit johkasámi kultuvrra ja ahte luossabivddu bisseheapmi sáhttá geahnohuhttit kultuvrra.
Ovdáneame
Olu jagiid lea uhcán luossa gorgŋen Deanučázádahkii gođđat ja einnostuvvo uhcán luossa gorgŋet maiddái 2023 geasi. Guokte áigodaga almmá luossabivddu haga lea dattetge dahkan buriid, ja geahnohis gođđannálit leat laskan vaikko eai leat nu bures ceavzán mearas. Dát guoská erenoamážit daid bajit oalgejogaide gos leat ovdalašáigge garrasit bivdán ja gos leamaš unnán gođđoguolit. Vaikko lea buorre ovdáneapmi, de lea ain guhkes gaska ovdal go gođđoguolemihttomearri lea jukson ja ahte lea doarvái luossa maid sáhttá bivdit.
– Deanučázádaga luossanáli hálddašeapmi lea máŋggabealat, mas lea olu maid berre vuhtii váldit ja vuoigatvuođat maid ferte deattuhit. Nu mo luossanáliid dilli lea dál, de leat mii gávnnahan ahte luossanálit eai gierdda bivddu. Dalán go šaddá dan mađe luossa čázádagas maid sáhttá bivdit, de rahppo ráddjejuvvon bivdu vuoigatvuođalaččaide, lohká dálkkádat- ja birasministtar Espen Barth Eide.
Rievdadusat Deanučázádaga bivdonjuolgadusain Oanehaččat
I – Deanučázádaga rádjagaskka njuolggadus nummar 861 rievdadusat 18.05.2022 jagi 2023:i:
Jagi 2023 gildojuvvo luossa- ja valasbivdu. Ii vuvdo fanasbivdokoarta olggobeale olbmuide. Stággobivddus sáhttá geavahit 0,25 siimma ja stuorámus áŋkoriin nummar 8. Báikeolbmuid guolásteaddjit sáhttet bivdit eará guollešlájaid go luosa ja vallasa bivdoáigodagas 01.06.–20.08.2023. Olggobeale olbmot sáhttet bivdit ovttain stákkuin ja geavahit dolgevuoggareaidduid gitta 6 luohkái, mas lea 0,25 siibma ja stuorámus áŋkorsturrodat nummar 8. Ii leat lohpi golgadit jagi 2023. Ii leat lohpi bivdit njáŋggofirpmiin luosa, guvžžá dahje vallasa. Ii leat lohpi buođđut 2023:s. Guolástanáigi bivdit eará guollešlájaid go luosa dahje vallasa, álgá go jiekŋa manná ja bistá gitta geassemánu 20. beaivái. Dasa lassin lea lohpi sáimmain bivdit eará guollešlájaid borgemánus Leavvajoga njálmmis gitta Ráidenjárgii. 01.08.–20.08. Olggobeale olbmuin ii leat lohpi fatnasis bivdit 2023:s. Deanučázádaga guolástanhálddahussii addá lobi bargui man mihttomearri lea geahpedit ruoššaluosa čázádagas 21.07.–31.08., heivvolaš bivdoreaidduin ja dohkkehuvvon eretbivdinplána mielde.
II – Deanučázádaga vuolemus oasi Norgga bealde njuolggadus nummar 862 rievdadusat 18.05.2022 jahkái 2023:
2023:s ii leat dáinna bivdokoarttain lohpi bivdit luosa dahje vallasa. Olggobeale olbmot geat bivdet eará guollešlájaid go luosa dahje vallasa, eai sáhte geavahit assát siimma go 0,20 ja stuorimus áŋkorsturrodaga go nummar 10. Stuorimus áŋkorsturrodat maid báikeolbmot sáhttet geavahit lea nummar 8. Ii leat lohpi golgadit, iige buođđut 2023:s. Iige leat lohpi bivdit luosa dahje vallasa njáŋgofirpmiin 2023:s. Eará guollešlájaid sáhttá bivdit dan rájes go jiekŋa manná gitta geassemánu 20. beaivái. Buot luosaid ja vallasiid galgá luoitit fas čáhcái. Deanučázádaga guolástanhálddahussii addojuvvo váldi addit lobi bargui man mihttomearri lea geahpedit ruoššaluosa čázádagas 21.07.–31.08. áigodagas, heivvolaš bivdoreaidduin ja dohkkehuvvon eretbivdinplána mielde.
III – Deanučázádaga Norgga beale oalgejogaide Anárjoga ja Skiehččanjoga njuolggadus nummar 863 rievdadusat 18.05.2022 jahkái 2023:
2023:s ii leat lohpi bivdit luosa dahje vallasa. Deanučázádaga guolástanhálddahus sáhttá guhkidit bivdolobi áigodaga eará guollešlájaide earret luosa ja vallasa dihto guovlluin jus dat lea dehálaš siseatnanguliide ja ahte bivdu ii leat vahágin lussii dahje vallasii. Kárášjogas ja Iešjogas ii leat lohpi bivdit buođuin dahje njáŋgofirpmiin luosa, guvžža dahje vallasa jagi 2023. Buot luosaid ja vallasiid galgá luoitit fas johkii. Deanučázádaga guolástanhálddahussii addojuvvo váldi addit lobi bargui man mihttomearri lea geahpedit ruoššaluosa čázádagas 21.07.–31.08., heivvolaš bivdoreaidduin ja dohkkehuvvon eretbivdinplána mielde
Dás gávdná loahpalaš mearrádusa mii guoská Deanučázádaga 2023 guolástannjuolggadusaide.
