Deanu gielddas leat registreren 151 ráfáiduhtton sámi vistti.
Sámediggi lea registreren Deanus 151 Sámi vistti mat leat ráfáiduhtton, ja duorastaga golggotmánu 3. beaivve ledje ollu olbmot boahtán go Sámediggi bovdii eaiggádiid ja eará berošteddjiid čoahkkimii Deanu ráđđevissui.
Lagabui 30 olbmo bohte čoahkkimii, gos Sámediggi čilgii viessoregistrerenprošeavtta birra ja Sámedikki doarjjaortnegiid birra ráfáiduhtton ja gáhttenárvosaš sámi viesuid várás. Ulbmil lei buorebut oahpásmuvvat sámi visttiid eaiggádiidda, vai lea álkit váldit oktavuođa go leat gažaldagat ráfáiduhtton visttiid divvuma birra, čállá Sámediggi preassadieđáhusastis.
