Logát luohká oahppit besset NRK gilvvu «Klassequizen» finálii.
Logát luohká oahppit besset NRK gilvvu «Klassequizen» finálii.
Deanu šaldi logát luohká oahppit leat riikka čeahpimusaid searvvis, go dál leat beassan finálii «Klassequizen» gilvvus, man NRK lágida.
Fylkkafinálas časke Girkonjárgga logát luohká, ja nu ledje vuosttaš skuvla Finnmárkkus geat besse viidásit.
– Lei hirbmat gelddolaš, ja lei nu somá go vuite! Vaikke Girkonjárggas ledje maid čeahpes oahppit, šattai buorre gilvu, lohká Deanu šaldi skuvlla rektor Else Marie Seim.
Ieža ráhkkanan
Álgovuorus birgejedje mánát bures, go máhtte buot 12 gažaldaga. Nu sii ledje ge maid álgovuoruin čeahpimusat.
Rektor muitala ahte oahppit leat ieža astoáiggis ráhkkanan gilvvuide, ja eai leat skuvllas bidjan áiggi ráhkkaneapmái.
Oahppit besse ieža válljet áigo go searvat gilvui, ja luohkás leat vuorbádan geat besset mielde.
– Lean áŋgiris ja čeahpes mánát, geat čuvvot mielde das mii máilmmis dáhpáhuvva. Sii leat ieža mearridan movt ráhkkanit, okta lei quiz gažaldagaid lohkan, nubbi fas lei spábbačiekčamis čiekŋudan, čilge Seim.
Son lohká ahte olu dain gažaldagain maid ledje dakkárat maid oahppit ohppet skuvllas.
Hirbmadit ordnen
Eará oahppit Deanu šalddi skuvllas ledje maid čuovvume gilvvu. Skuvla lei oastán biepmu mánáide, vai ellet geahččat ja movttiidahttit iežaset skuvlaolbmáid.
– Lei hui fiinna vásáhus, ja gilvaleaddjit ieža ledje nu gealdagasas. Mii leimmet ordnen hui fiidnát skuvllas, ja illudeimmet go min skuvla vuittii, muitala rektor.
– Fiinna gilvu
Klassequiz lea gilvu masá buot riikka logát luohkát sáhttet searvat. Gilvu lea fylkkaid mielde, ja juohke fylkkas besset dat guokte buoremus skuvlla viidáset riikkafinálii. Gažaldagat quizas sáhttet leat vaikke man birra, maid skuvllas sáhttet oahppan, dahje muđui diehtu servodaga birra.
– Mu mielas lea fiinna gilvu mii movttiidahttá nuoraid čuovvut mielde servodagas. Lea buorre go dákkár gilvu lea, oahppit áŋgiruššet gazzat dan oahpu, lohká Else Marie Seim. Son dál illuda riikkafinálii.
NRK gilvu
NRK čađaha gilvvu, ja lea ge NRK Finnmárku mii lea johttán skuvllaid mielde ja gažadan ohppiid.
Finnmárkkus ledje 24 skuvlla searvan, gilvui. Vuosttaš finalista lea Deanu šaldi skuvla. Nubbi finálista lea Honnesváhkii, go vuite Hammerfeasta skuvlla vuostá bearjadaga.
