-Almmuhus-
-Almmuhus-
SMÁVVAOĐĐASATIvdne­čuovggaiguin dorjot Ukraina 

Ivdne­čuovggaiguin dorjot Ukraina 

-

-

Deanu šaldái leat bidjan Ukraina leavgaivnniid čájehandihte ahte vuostálastet soađi man Ruošša bullehii. 

Maŋimuš beivviid leat miehtá máilmmi bidjan fiskes ja alit čuovggaid dovddus visttiide čájehandihte oktiigullevašvuođa Ukraina álbmogiid. 

Ikte, njukčamánu 2. beaivvi bidje maiddái ivdnečuovggaid Deanu šaldái. Stáhta geaidnodoaimmahagas digaštalle dán jurdaga muhtin siskkáldas prošeaktačoahkkimis mannan vahkkus. 

– Deanu šaldi šattai 2021:s buoremus olgoprošeaktan ja faskii ge Norgga čuovgabálkkašumi dan ovddas. Danin lávet jámma ságastallat makkár čuovggat galggaše šaldis ja dál lei hui lunddolaš čalmmustahttit ahte vuostálastit soahtedaguid, lohká prošeaktajođiheaddji Kaare Martin Ramberg preassadieđáhusas. 

Gielda doarju

Dakka maŋŋel go Stáhta geaidnodoaimmahat lei ságastallan bidjat fiskes ja alit čuovggaid Deanu šaldái, de válddii maiddái Deanu sátnejođiheaddji singuin oktavuođa. Sus lei maid dáhttu ivdnečuovggaiguin čalmmustahttit ahte vuostálastet soađi. 

– Deanu álbmogii lea hirbmat dehálaš ahte beassat čájehit solidaritehta ukrainalaččaide. Šaldi ivdnečuovggat gaskkustit min jurdagiid ja dovdduid, lohká Pedersen. 

Stáhta geaidnodoaimmahahkii ii lean váttis addit lobi geavahit Ukraina leavgaivnniid šaldis. 

– Dá lei buorre jurdda man áinnas háliideimmet doarjut, lohká Stáhta geaidnodoaimmahaga huksendirektevra Kjell Inge Davik. 

Guokte vahkku

Deanu šaldis galget báitit fiskes ja alit čuovggat juohke eahkeda diibmu 18:00-24:00. 

Gaskaija áigge rievdá čuovga fas vilges ivdnái. 

Álgovuorus lea mearriduvvon ahte dát čuovgaivnnit leat anus guokte vahkku. 

-Almmuhus-