Dearvvašvuođadirektoráhta lea juohkán oktiibuot 50 miljovnna gielddaide Norggas organiseret doavttirváktabálvalusa.
Ulbmil lea unnidit doavttirváktadoaktáriid noađi smávva gielddain.
Deanu gieldda dearvvašvuođabálvalusa doaibmajođiheaddji, Lillian Saua, lea duđavaš go sin gielda lea ožžon doarjaga. Son muitala ahte sin fástadoaktárat heavganit bargguin ja ahte lea váttis rekrutteret ođđa fástadoaktáriid.
– Mis lea geahččaladdanortnet ja leat virgádan guokte turnusdoaktára mat suoidnemánus álgiba doavttirvávttas bargat. Sudnos leat 2-3 beaivvi friddja vahkkui, muđui bargaba birra jándora, muitala son.
Soai leaba dáppe dán jagi lohppii, muhto Saua sávvá ahte sáhttet joatkit dáinna ortnegiin boahtte jagi maid. Ruhtadoarjja boahtá dahkat dan álkibun.
– Vejolašvuohta bođii dego eŋgel almmis
Gielddain gos leat unnit go 5000 ássi ja unnán fástadoaktárat lei vejolašvuohta ohcat doarjaga. Deanu gielddas lea doaktáriin olu bargu ja lea guhkes vuordináigi doavttirdiimmu oažžut, danin sii ohce ge Dearvvašvuođadirektoráhtas doarjaga go dat vejolaš bođii.
– Vejolašvuohta bođii dego eŋgel almmis. Dál mii sáhttit unnidit fástadoaktáriid noađi ja maid fállat eambbo doavttirdiimmuid, dadjá Lillian Saua.
37 eará smávvagieldda maid leat ožžon doarjaga
Earret earáid leat dát gielddat maid ožžon doarjaga: Porsáŋgu, Unjárga, Várggát, Báhcavuotna, Davvesiida, Ákŋoluokta, Láhppi, Gáivuotna, Návuotna, Ivguvuotna, Gálsa, Grane, Snoase ja Aarporte.
Ollislaš listtu gávnnat Dearvvašvuođadirektoráhta ruovttusiiddus.
