– Dát čalmmustahttá ovdáneami

– Dat hui bures čalmmustahttá dan stuorra ovdáneami mii lea leamaš sámi servodagas dan rájes go Sámediggi ásahuvvui ja vel ovdal dan. 30 jagi áigi leimmet mii olggobealde demonstreremin, dál leat mii siste bovdejuvvon guossin Norgga našunála parlameanttas ja dat muitala ahte juoga lea dáhpáhuvvan, dadjá Sámedikki presideanta Aili Keskitalo.

Sámediggi doallá dán vahkku dievasčoahkkimiid Stuorradikkis Oslos, ja Keskitalo oaivvilda dan čájehit ahte sámi álbmogis lea buoret sajádat Norgga servodagas ja Norgga demokratiijas go ovdal.

– Dat lea dehálaš midjiide dan dihte go mii leat maid buorebut oassin Norgga demokratiijas go ovdal leimmet. Mun sávan ahte mii bastit dál geavahit dan veahkkin iežamet áššiid ovdáneamis ovddasguvlui maid. Go dehálaš lea ahte dat hástalusat mat mis leat dál eai leat eisege ollislaččat čovdojuvvon. Leat ain barggut mat vurdet, lohká son.

Dievasčoahkkin dollojuvvo Láhkadiggelanjas, mii lea nubbi dain lanjain Stuorradikkis gos buot lagat meannuduvvo gitta 2009 rádjai. 2007:s mearridii Stuorradiggi heaittihit Láhkadikki ja Odeldikki.

Das rájes lea Stuorradikki dievasčoahkkin meannudan buot áššiid.

– Dat lea dieđusge erenoamáš dákkár gárdimis doallat čoahkkima gos diehtá ahte hui ollu dehálaš, historjjálaš mearrádusat leat dahkkon ja dat lea dieđusge earálágan olggosoaidnit go min čoahkkinlatnja sámedikkis. Dat lea viehka olu boarrásat ja dat lea hui olu dehálaš olbmot geat leat čohkkán dáid stuoluin, dadjá Keskitalo.

Keskitalo lohká Norgga demokratiija leat boarráseabbon go sámi demokratiija ja das leat eanet árbevierut go sámi demokratiijas.

– Nu ahte dat addá muhtin lágan alla árvosaš dovddu, ahte mii leat dáppe ja beassat geavahit daid lanjaid ja čájehit sihke min iežamet álbmogii ja maiddái stuorraservodahkii ahte mii leat dohkkehuvvon.

Unnán stuorradiggeáirasat báikkis

Stuorradikki čakčasešuvdna ii leat vel álgán, danne lei ge Stuorradiggái vejolaš bovdet Sámedikki doallat dievasčoahkkima Stuorradikkis.

Dat mearkkaša ahte Stuorradikkis eai leat nu olu politihkkárat juste dán áigge go sámedikkeáirasat leat deike čoahkkanan, liikká oaivvilda Sámedikkepresideanta ahte dát čoahkkin buktá vejolašvuođa gulahallat stuorradiggeáirasiiguin.

– Dat gáibida ahte mii aktiivvalaččat bargat sin ektui sihke dál go leat dáppe ja muđuid. Mun jáhkán maiddái ahte dál go Sámedikkeáirasat leat leamaš dáppe ja dovdet veahá dan vuogádaga, viesu ja viidáseappot, de šaddá mihá álkibut sidjiide váldit oktavuođa stuorradikkeáirasiiguin. Go sis lea maid ovddasvástádus sámi áššiide ja mii leat maid jienasteaddjit ieža Norgga demokratiijas, ja dat galget maiddái bargat min ovddas, lohká Keskitalo.