Odne almmuhuvvojit dán jagaš njeallje ofelačča Márkomeanu festiválas.
16 sámi nuorat ledje ohcan beassat ofelažžan, ja sis ledje njealjis geat ožžo niegu ollašuvvot šaddat dán jagaš ofelažžan. Ohccit leat čađahan jearahallama ja bargan bargobihtáid mat ledje mielde mearrideame geat heivejit dan bargui.
Geigejit barggu viidásit
Maŋŋel go Sárá Márjá Utsi, Anne Berit Pulk, Jon-Christer Muenia ja Yvonne-Marie Miniggio leat ovtta jagi beassan leat ofelažžan šaddet sii dál geiget barggu njealji ođđa ofelaččaide. Dát dáhpáhuvvá odne suoidnemánu 24.beaivvi Márkomeanu festivála váldolávddis diibmu 19:40.
Juogadit vásáhusaid
Dán jagi galget ođđa ofelaččat lávddi ala juo nuppi beaivvi. Márkomeannu festivála lea addán dan gutni sámi ofelaččaide leat doaluid láidesteaddjin sihke bearjadaga ja lávvordaga. Dasa lassin galgaba ovddeš ofelaččat Sárá Márjá Utsi ja Yvonne-Marie Miniggio doallat logaldallama lávvordaga diibmu 17:30 mas lea fádda «Mu, du ja min identitehta». Ovddeš ofelaččat háliidit juogadit vásáhusaid maid leat vásihan ofelašjagis.
Dán jagaš ođđa ofelaččain šaddá hirbmat miellagiddevaš jáhkki gos besset deaivvadit ođđa olbmuiguin geat eai soaitte diehtit nu ollu sápmelaččaid ja sin kultuvrra birra.