Girkuid Máilmmiráđđi ja Norgga girku Sámi girkoráđđi lágidit riikkaidgaskasaš konferánssa álgoálbmogiid ja soabadanproseassaid birra, geassemánu 20. ja 21.beaivvi Girkuid máilmmiráđi čoahkkima oktavuođas Troanddimis.
Girkuid Máilmmiráđđi ja Norgga girku Sámi girkoráđđi lágidit riikkaidgaskasaš konferánssa álgoálbmogiid ja soabadanproseassaid birra, geassemánu 20. ja 21.beaivvi Girkuid máilmmiráđi čoahkkima oktavuođas Troanddimis.
156 oasseváldi 29 riikkas leat Troanddimis konferánssas ságastallamin soabadanproseassain ja álgoálbmogiid hárrái.
– Olbmot beroštit dás eambbo go mii jáhkiimet. Mii eat duostan márkanfievrridit konferánssa dáppe ruovttus vai riikkaidgaskasaš guossit čáhket searvat. Mii fertiimet viiddidit 100 sajis gitta 150 sadjái vai eambbogat besset searvat, ja dál leat olu olbmot boahtán, dadjá Sámi girkoráđi váldočálli Tore Johnsen.
Stuora beroštupmi
156 olbmo leat boahtán, ja 65 olbmo bohtet eará sajiin máilmmis go Eurohpás. Troanddimis oassálastet 29 riikka ja 30 iešguđetlágan álgoálbmoga leat čoahkkimis. 90 oasseváldis lea álgoálbmotduogáš.
– Min ulbmil lei čohkket dábálaš olbmuid, aktivisttaid ja njunnošiid geat barget girkuin ja geat eai bargga girkuin, ja álgoálbmogiid ja daid geat eai leat álgoálbmogat – nu ahte sii čoahkkanit ságastallat soabahusa birra, muitala Sámi Girkoráđđi preassadieđáhusas.
ON álgoálbmogiid erenoamášraportevra doallá sáhkavuoru ja nu dahká maid áirras daid kommišunáraid gaskkas gii gullá Kanada duohtavuohta- ja soabahuskommišuvdnii. Konferánssas leat maid Norgga Sámedikki politihkalaš njunnošat, Ruoŧa vealahanáittardeaddji, Kanada ambassáda ja Gieldda- ja ođasmahttindepartemeanta.
Guhkálmas proseassa
Sámi girkoráđđi lea guhká bargan soabahanfáttáin. Sámi girkoráđđi lea áššiin bargan dan rájes go Girkočoahkkin 1997 almmolaččat šállošii go lea leamaš mielde dáruiduhttimis.
– Muhtin sámi birrasiin ii lean nu jáhkku dán bargui dalle go muitaleimmet sámi ja dáčča servodaga soabahusproseassaid birra. Mun jáhkán lea leamaš ballu ahte soabahusášši ságastallan doalvu dasa ahte duohtavuođa alde ferte soabaduvvot. Muhto soabahus álgá das ahte ságastallojuvvo boasttuvuođain mat leat dáhpáhuvvan, dadjá Johnsen KPK:i.
