Čalmmehisolbmuidsearvi (Blindeforbundet) leat máŋga jagi háliidan oažžut sadjái psyhkalaš dearvvašvuođa fágabirrasa sidjiide geain leat oaidninváttut. Dál áigot politihkkárat ollašuhttit dán sávaldaga.
Stuorradiggeáirras ja dearvvašvuođapolitihkkár, Åshild Bruun-Gundersen, bijai miessemánus ovdan fálaldaga ásahit psyhkalaš dearvvašvuođabálvalusa sidjiide geat masset oainnu, ja oaččui Stuoradikkis eanetlogu doarjut evttohusa.
Ráđđehusa bušeahttaráđđádallamis geassemánu 11. beaivvi mieđihii ráđđehus bidjat 2.5 miljovnna ruvnno reviderejuvvon nášunálabušeahtas Nationála dearvvašvuođa ja buohcciviessoplánii 2020—2023 sajáiduhttit dearvvašvuođabálvalusa.
– Dát čájeha ahte eai dárbbaš álot leahkit dat stuora bušeahttaboastat mat mearkkašit buot eanemus. 2.5 miljovnna ruvnnuin sáhttá veahkehit daid olbmuid geain eallin rievdá áibbas, go masset juoidá maid leat váldán diehttelassan olles eallima, namalassii oainnu. Mun jáhkán buohkat ipmirdit ahte dalle sáhttá leat dárbu psyhkalaš dearvvašvuođabálválussii, dadjá Bruun Gundersen.
Blindeforbundet jođiheaddji Terje Andrè Olsen lohká illubeaivin dán buot olbmuide geain leat oaidninváttut.
– Dát fálaldat boahtá addit buori veahki sidjiide geat dárbbašit dan. Ollu giitu buohkaide geat leat dáinna áššiin bargan nu guhká, lohká Olsen preassadieđáhusas.
