Duojáriid Ealáhussearvi láigohišgoahtá gievrras goarrunmášiinnaid Kárášjoga duojáriidda.
Duojáriid Ealáhussearvi láigohišgoahtá gievrras goarrunmášiinnaid Kárášjoga duojáriidda.
Duojáriid Ealáhussearvi lea oastán njeallje goarrunmášiinna, maid duojárat galget beassat láigohit jus dárbbašit stuorra mašiinnaid geavahit.
– Girdila masá
Searvi lea oastán guokte náhkkegoarrunmášiinna ja guokte gievrras goarrunmášiinna.
Duojáriid Ealáhussearvvi čálli Biret Ristin Sara muitala iežas geahččalan dáid ođđa goarrunmášiinnaid, ja son orro hui duđavaš daiguin.
– Dat leat máilmme gievrras mášiinnat, ja hui johtilit goarostit. Go duolmmasta juolggi de masá girdila vel, čilge Sara.
Sara muitala mášiinnaid álki geavahit, muhto searvi maiddái čájeha mo daid galgá geavahit geassemánu 20. beaivvi.
Dalle rahpet oainnat dán fálaldaga duojáriidda.
– Dáid gal galgá masá juohkehaš sáhttit geavahit, eai leat dakkár mearehis váttes prográmmat ja nu ain, čilge Sara.
Máŋga čuohte duháha máksán
Mášiinnat leat divrasat, ii ge searvi leat iskan leago beroštupmi daid geavahit.
– Muhto mii leat jurddašan ahte de lea duojáriidda vejolašvuohta fitnat min luhtte goarromin, eai ge dárbbaš ieža investeret dákkár mášiinnaide. Dat leat oainnat máksán máŋggaid čuđiid duháhiid oktiibuot, čilge searvvi čálli.
– Muhto eat mii leat dán jurddašan gávpin alccemet, dahje dienasin, danne leat govttolaš hattit mis. Muhto láigu galggašii gal veahá gokčat goluid, čilge Sara.
Gávttiid ja náhkkegahpiriid
Mášiinnaiguin muitala Sara sáhttit goarrut feara maid.
– Sihke guolgadujiid, sisttiid, náhkiid muhto maiddái loavddaávdnasiid ja nu ain. Ja de lea okta mášiidna mii goarru veahá fiidnát sávnnji, dainna sáhttá ges gávttiid goarrut, čilge son ja sávvá olbmuide buresboahtima boahtit geahččat mášiinnaid rahpanbeaivvi, maŋit lávvardaga.
DES duddjonlanjat lea Sørnes-visttis, Fitnodatgeainnus, Kárášjogas.
