Ingá Márjá Sarre lea ožžon dáiddastipeandda, ja dainna beassá ollašuhttit iežas niegu. Geasset son vuolgá Los Angelesii gos galgá oahppat neaktima oahpahit.
Ingá Márjá Sarre lea ožžon dáiddastipeandda, ja dainna beassá ollašuhttit iežas niegu. Geasset son vuolgá Los Angelesii gos galgá oahppat neaktima oahpahit.
Ingá Márjá Sarre lea ožžon Stáda dáiddárstipeandda Kulturráđis.
78 700 ruvnnuin galgá son vuolgit Amerihkkái, Los Angelesii, oahppat oahpahit neaktit.
Guhká niegadan
Lea okta dihto neaktinteknihkka man son galgá oahppat oahpahit, dakkár teknihkka man neavttárat Hollywoodas geavahit.
Son lea ieš máŋgii leamaš kurssas oahppame teknihka sihke Oslos ja Stockholmas.
Sarre lea guhká háliidan vuolgit Los Angelesii juste dán kursii.
– In livčče sáhttán dan dahkat ruhtadoarjaga haga, dat lea maid lean niegadan dahkat, ja dál lea ođđa niehku mii šaddá duohtan, lohká Inga Marja Sarre. Son muitala ahte illosii nu ahte measta huikkádii, go oaččui dieđu doarjaga birra.
Jáhkká stuora beroštumi
Skandinávias eai gávdno go golmmas geat oahpahit dán neaktinteknihka.
Sarre háliida Sámis oahpahit teknihka, vai sámi filbmaneaktinkvalitehta šaddá vel buorebun. Muđui Skandinávias áigu maid lágidit kurssaid.
– Dál, go sámi filbma lea álgán beaggit, «Sameblod» filmma dihtii, livččii somá fállat kurssa sidjiide geat niegadit neaktit filmmas ja maiddái sidjiide geat leat hárjánan neavttárat. Teknihka sáhttá maid geavahit teáhteris, muhto lea eanas filmmas, čilge Sarre.
Son lohká ahte kursa lea ávkin maid alcces, go šaddá nannoseabbon ja sihkkareabbon teknihkas.
Son jáhkká dál šaddat stuora beroštumi sámi filmmaide, ja dat lea maid oassin manne áigu oahppat oahpahit filbmaneaktinteknihka.
– Sámis mis lea fiinna luondu, lea eksohtalaš. Olbmot háliidit oaidnit dan mii lea earálágan. Ii dušše gávpotolbmuid, muhto maid luondduolbmuid eallima birra.
Ráhkkanit bures
Geassemánus son vuolgá Los Angelesii, dasa ferte olu ráhkkanit.
Son áigu lohkat girjjiid ja hárjehallat eaŋgalasgiela. Mánnábiiggá ferte maid gávdnat.
– Teknihka ii leat álki čilget ovttain cealkagiin, das leat 12 ceahki maid ferte čađahit. Ferten maid lohkat olu, vai leat bures ráhkkanan go vuolggán, lohká son.
890 dáiddára ožžon stipeandda
Stáhta stipeanda- ja dáhkádusdienaslávdegoddi lea juohkán stipeanddaid 890 dáiddárii, Norggas ja olgoriikkas.
– Lea alla dássi, govdodat ja aktivitehta Norgga dáiddaeallimis, lohká lávdigoddejođiheaddji Alfhild Skaardal preassadieđáhusas.
Son čilge ahte stipeanda lea ávkin buoridit dáidaga kvalitehta, Norgga profeššunealla dáiddaeallimis.
– Dál ožžot olu dáiddárat vejolašvuođa čiekŋudit iežaset dáidagis, lohká son.
Badjelaš 7000 dáiddára ledje ohcan stipeandda. 24 iešguđet stipeandalávdegotti leat meannudan ohcamiid, main vuoruhedje kvalitehta ja aktivitehta. Eai leat go 12 proseanta ohcamiin mat dohkkehuvvojit.
Skaardal lohká olles servodat ferte váldit ovddasvástádusa, ja čáhkkehit saji dáidagii.
– Dáidda lea áddjás bargu. Danne leat stipeanddat nu dehálaččat. Liigeruhta addá oadjebasvuođa dáiddárii, beassat čiekŋudit ja ovdánahttit iežas dáidaga.
