Stuorradikki Energiija ja biraslávdegoddi lea mearridan dáhttut ráđđehusa soahpat ođđa Deanosoahpamuša Suomain.
Duorastaga celkkii Energiija ja biraslávdegoddi čuovvovaš mearrádusa Norgga ja Suoma Deanočázádaga ođđa guolástansoahpamušas mii vuolláičállui čakčamánus 2016.
Dáhttot vuoigatvuođalaččaide guovddáš rolla
Lávdegoddi rávve Stuorradikki dáhttut ráđđehusa álggahit ođđa ráđđádallamiid Suomain soahpat ođđa Deanočázádaga guolástansoahpamuša.
– Dat vurdojuvvo ahte guktui beal rájá, Norgga ja Suoma beal, vuoigatvuođalaččat ožžot guovddáš rolla dáid ráđđádallamiin, čállet sii.
Lávdegottis eai leat makkárge mearkkašumit, čujuhit dušše proposišuvdnii ja rávvejit Stuorradikki nu dahkat.
Lávdegotti eanetlogu mearrádusa ovddidit Bargiidbellodat, Ovddádusbellodaga áirras Jan-Henrik Fredriksen, Guovddášbellodat, Sosialisttalaš Gurutbellodat ja Ruoná Birasbellodat.
Njukčamánu 4. beaivvi dahká Stuorradiggi loahpalaš mearrádusa áššis.
Sámedikkis ilus
Sámediggepresideanta Vibeke Larsen lea ilus.
– Lea hui buorre. Buorre go dáhttot vuoigatvuođalaččaid oažžut guovddáš rolla šiehtadallamiin, dat leage maid mii leat gáibidan, lohká Larsen.
Sámedigge ráđđelahttu Árjja ovddas Inger Eline Eriksen, guđes lea ovddasvástádus dán ášši čuovvolit, lea eambbo várrogas.
– Jua, lea buorre mearrádus lávdegottis. Muhto ii leat sihkar ahte diet mearrádus oažžu eanetlogu go Stuorradiggi galgá dan meannudit, lohká Eriksen.
– Veaháš vuoitun
Son muitala ahte mearrádusas boahtá muhtin muddui ovdan dat maid Sámediggi lea gáibidan:
– Die lea maid mii leat gáibidan, muhto dien mearrádusas daddjo dušše ahte galget leat mielde šiehtadallamiin, mii han gáibidat maiddái ahte sin vuoigatvuođat galget váldot vuhtii, čilge Eriksen.
Vaikke Eriksen leage ilus, de ii duostta gal ávvudit vuos.
– Mun balan ahte vaikke lávdegottis lea eanetlohku, de ii leat Stuorradikkis eanetlohku. Muhto lea veaháš vuoitun midjiide go lávdegottis leat nie mearridan. Dat leat de váldán vuhtii dan maid mii leat ovddidan. Mii leat geavahan Sámedikkis hui olu návccaid ovddidit dán ášši ja dát addá midjiide movtta bargat viidásat dáinna, go oaidnit doppe leat bellodagat mat dorjot min.
– Šállošahtti go ráđđehusa bellodagat eai doarjjo
Lávdegotti unnitlohku, masa gullet Olgeš, Risttalaš Álbmotbellodat, Gurut ja Ovddádusbellodaga áirras Øyvind Korsberg, árvala ges ahte Stuorradiggi dohkkeha Deanosoahpamuša nu mo dál lea.
– Lea šállošahtti go ráđđehusa bellodagat eai doarjjo báikkeolbmuid ja eamiálbmot vuoigatvuođaid, lohká Eriksen.
Lávdegotti mearrádusa sáhtát dáppe lohkat.
