-Almmuhus-
OĐĐASAT Dag Andreas geahččala lihku Suomas

Dag Andreas geahččala lihku Suomas

-

-

KuPs dahje Kuopion Palloseura lea viežžan Kárášjoga spábbačiekči Dag Andreas Balto geahččalančiekčamii Supmii. 

Savon Sanomat Areenas Kuopios soaitá šaddat sámi gándda ođđa ruovttušillju go son lea geahččaleamen oažžut šiehtadusa Suoma buoremus spábbačiekčanjoavkkuin. 

Balto čievččai Álttá joavkku ovddas gitta ođđajagemánnui, go su šiehtadus Álttáin nogai. Sámi gánddas eai váillo fálaldagat go son lea maid ožžon fálaldaga Obos-ráiddu Øygarden FK joavkkus mii lea olggobealde Bergena. 

– Mun lean ožžon fálaldaga Øygardenis, muhto lean dieđihan ahte dárbbašan jurddašanáiggi. Mun háliidan oaidnit boahtá go geahččalančiekčamiin Suomas mihkkege ovdal go mearridan. Ii ge leat veadjetmeahttun ahte čievččan Álttás boahtte jagi. Muhto dál álggos gal áiggun dahkat buot čájehan dihte KuPs-jođiheddjiide ahte mun lean almmái gean galggaše geahččalit, dajai Balto Altapostenii árat dán vahkku.

Champions League

Go KuPs vuittii Suoma Veikkausliiga diibmá, de besset sii čiekčat rátkkačiekčama Champions Leaguei, gos sáhttet deaivvadit Eurohpá buoremus spábbačiekčanjoavkkuiguin. 

– Mun in dovdda Suoma spábbačiekčama nu bures, muhto dát orui hirbmat gelddolaš. Lea somá oažžut jearaldaga boahtit geahččalit čiekčat joavkku mielde mii galgá čiekčat Champions League rátkkačiekčamiid 2020:s, ja mun gal healkkehin, muhto dadjen «juo» ovttatmano go jearaldat bođii. Dán vejolašvuhtii in sáhttán dadjan «ii», dajai son Altapostenii. 

Ávvir ii ožžon Balto ságaide dán áššis. 

- Advertisement -
-Almmuhus-