Nu lohka duojár Ellen Bongo Eira. Son ii liiko go su goarrun šávkkáid gohčodit suoma fabrihkka šávkán.
Nu lohka duojár Ellen Bongo Eira. Son ii liiko go su goarrun šávkkáid gohčodit suoma fabrihkka šávkán.
Ellen Bongo Eira lohka ahte sus ii leat miella šat boahtit Márkomeannui vuovdit dujiid, go dovdá ahte šaddá juohke jagi bealuštit iežas dujiid, namalassii šávkkáid maid vuodá.
– Dát han lea Guovdageainnu dološ šávká, nu go 100 jagi áigi lei, lohka duojár ja čájeha Ávvira journalistii gova dološ Guovdageainnu šávkkás.
Dološ málle
Son buohtasdahttá iežas goarrun šávkkáid dainna mii govas lea.
– Lea sullii seamma allodat… Ja čieža hearvva, lohka Ellen Bongo Eira ja studere gova.
Son geahččá iežas dujiid, dain leat maid birrasiid čieža hearvva.
– Dalle han atne dan mii lei, lohka son, ovdal joatká.
– Olbmot lohket suoma turista gáhppirin daid, dá leat mu duojit maid lean gorron dološ málle mielde. Dat leat suoma fabrihkat mat leat váldán minstara min dološ šávkkáin, ja gorron dan mielde. Dál leat olbmot álgán doaivut ahte leat suoma gáhppirat.
Bolde šávkká
Ellen Bongo Eira lea leamaš Márkomeannus máŋgii, vuodime dujiid ja gálvvuid, muhto dál son ii dovdda iežas šat nu buresboahtin iežas dujiiguin. Son muitala ahte diibmá, lávddi alde, čuohpadedje dakkár šávkká go son vuovdá.
Dán geasi son lei maid Riddu Riđđu festiválas. Doppe son lei vuovdán šávkká ovtta bárdnai, gii nuppi beaivvi bođii muitalit ahte soames lei dohppen su oaivvis eret šávkká ja bálkestan dollii.
– Dat gal orui oba váivi gullat, ja suhttadeaddji, lohká duojár.
Eai leat gieldán
Festiválajođiheaddji Marita Kristin Eilertsen lohka ahte sii ahte sii áigot ahte galgá váruhit geasa son vuovdá gáhppiriid.
– Mii eat leat gieldán su vuovdimis šávkkáid, muhto dan maid mii áigut lea ahte son galgá bagadallat kundariid, ahte geasa lea heivvolaš atnit dán šávkká, ja geasa ii leat. Márkomeannus gon gal oažžu vuovdit daid! lohka Eilertsen.
“Guhte oamasta duoji?”
Lávvordaga lágiduvvo seminára Márkomeannus, gos gažaldat maid galget digaštallat lea “Guhte oamasta rievtti duodjái?”. Seminára lágiduvvo ovttas Sámi Dutkamiid Guovddážiin (SESAM) mii lea gullevaš Romssa universitehtai.
Márkomeannu bovde digáštallamii dan birra makkár riektesuodjalus sápmelaččain lea iežaset kultuvrralaš erenoamášvuođaide go deaivvadit stuorraservodagain. Doppe galgaba Jacob R. Adams, doavttergrádastipendiáhtta Romssa universitehtas ja Marie Kvernmo, Sámi allaskuvllas, árvoštallat ja geahččalit addit vástádusaid.
