Øystein Rushfeldt čuoččuha ahte Norgga Sámiid Riikkasearvvi strategiija lea leamašan gilvit boasttu dieđuid.
Øystein Rushfeldt čuoččuha ahte Norgga Sámiid Riikkasearvvi strategiija lea leamašan gilvit boasttu dieđuid.
Nussira direktevra Øystein Rushfeldt cuiggoda Norgga Sámiid Riikkasearvvi (NSR) vuogi čađahit diehtojuohkima ruvkedoaimma birra, ja lohká iežas hirpmástuvvan vugiin mo ovddidit searvvi oainnu servodahkii.
– Ledjen Romssas debáhtas moadde beaivvi dás ovdal, go vásihin ahte NSR sámediggeáirras gilvvii boasttu dieđuid ruvkedoaimma birra. Jus áigot čađahit diehtojuohkima, mii lea hui dehálaš ja buorre dan oktavuođas, de berrejit aŋkke rivttes fáktadieđuid ovddidit, eaige iežaset oaiviliid ja árvvoštallamiid. Ruvkedigaštallan lea dehálaš digaštallan Finnmárkkus, nu lea maid dehálaš ahte leat rivttes fáktadieđut ja ahte sáhttá čujuhit gos lea ožžon dieđuid. Vásihan ahte NSR lea guhkit áigge čuoččuhan ollu boasttuvuođaid ruvkedoaimma birra. Sávvan ihttin, go dievasčoahkkin meannuda ášši, ahte leat rivttes dieđut vuođđun, lohká Nussir ASA direktevra Øystein Rushfeldt.
Ii jáhke gelddolaš bohtosa boahtit
Øystein Rushfeldta mielas lea buorre go ruvkedoaibma digaštallo, muhto deattuha ahte fertejit rivttes dieđut. Son lohká iežas čuovvut mielde Sámedikki dievasčoahkkima bohtosa go ihttin meannudit Nussiris ja Gumppenjuni ruvkedoaimma ášši.
– In hirpmástuva jus jienastit vuostá, go lea guhkit áigge leamašan čielggas maid NSR oaivvilda ruvkedoaimma birra nu go leat maid almmolaččat almmuhan. Nu in jáhke nu gelddolaš bohtosa boahtit, ii ge leat olus maid mii sáhttit bargat. Lea Sámedikki mearrádus ja sis lea dat vejolašvuohta, lohká Rushfeldt.
Jotket nu go leat dahkan
Øystein Rushfeldt lohká iežaset joatkit nu go leat maŋemuš čieža jagi dahkan.
– Eai leat makkárge rievdadusat, mii leat ain bargamin plánaiguin. Seammás háliidan dadjat ahte beroškeahttá maid aktivisttat oaivvildit de joatkit mii, muhto dohkkehat sin oainnu áššis, lohká Øystein Rushfeldt.
Vuorkágovva/Inga Marie Guttorm
Hilgu direktevrra čuoččuhusaid
Sámedikki ráđđelahttu Silje Karine Muotka biehttala ja hilgu Nussir ASA direktevrra čuoččuhusaid.
– Mis ii leat makkárge strategiija gilvit boasttu dieđuid. Mu hirpmástuhttá go fitnodat vállje strategiija seaguhit iežas politihkalaš jovkui, lohká Muotka.
Politihkkáriid bargu
Silje Karine Muotka joatká vástideames, ja lohká sin bargu lea maiddái kritihkalaččat digaštallat makkár váikkuhusat ruvkedoaimmas leat.
– Lea eahpesihkarvuohta makkár váikkuhus ruvkedoaimmas lea boahtteáiggis. Sus livččii leamaš vejolašvuohta boahtit Sámedikki rabas gulaskuddamii ja ovdanbuktit dieđuid ruvkedoaimma birra. Lea sin duohken buktit dieđuid almmolašvuhtii ja politihkkáriidda, lohká Muotka.
Fitnodaga ovddasvástádus
Sámedikki ráđđelahttu muitala ruvkedoaibmaáššis leat máŋgačuođi siiddu áššebáhpárat mat leamašan almmolaččat. Muotka mielas lea dehálaš ahte buohkat servet ja čuvgejit iežaset belliid áššis.
– Nu go mun dulkon Nussira, lea ahte sii dieđusge háliidit oažžut johtui ruvkedoaimma. Mus lea konkrehta ovdamearka mo sin bargovuogit leat, lean árvvoštallan gos Nussir lea čilgen ieš man gánnáhahtti ruvkedoaibma lea. Sii leat čujuhan gávcci jagi boares veaikehaddái, ja jus livčče dálá hatti váldán vuođđun, de ii livčče nu gánnáhahtti. Mun gal biehttalan su čuoččuhusaid, loahpaha Silje Karine Muotka.
