Ravggon-joavku ledje okta dain sámi musihkkáriin guđiid Ijahis Idja festivála ledje bovden seminárii oassálastet. Sii ledje ilus searvat, ja besse maid ovdanbuktit iežaset musihka guldaleddjiide semináras.
Ravggon-joavku ledje okta dain sámi musihkkáriin guđiid Ijahis Idja festivála ledje bovden seminárii oassálastet. Sii ledje ilus searvat, ja besse maid ovdanbuktit iežaset musihka guldaleddjiide semináras.
Ijahis Ija-festivála oktavuođas lávvardaga lágiduvvo musihkkaseminára sámemuseas Siiddas, Anáris. Dán jagi ledje bovden nuorra sámi musihkkáriid oasálastit ja muitalit veaháš iežaset joavkku ja musihkka birra.
Mielde ságastallamin ledje dovddus sámi neavttár, diktačálli ja musihkar Niillas Holmberg, Vuohčču joavku Ravggon ja Sámi oahpahusguovddáža musihkkastudeanttat.
Govven: Inga marie Guttorm
Váttis vástidit
Oassálastit ožžo vejolašvuođa vástidit mii lea sámi musihkka. Ravggon lávlu, Milla Pulska, logai dan váttis gažaldahkan mas sihkkarit leat máŋga vástádusa.
– Mun smiehttan sámi musihkka sáhttá leat ollu, lea go dat ahte joavkkus lea sápmelaš dahje ahte lea sámegilli sániid lávlagis, vai gullo go luohti? Lea nu ollu, in jáhke mus lea dat vástádus. Lea buorre ahte sámi musihkkárin leat buot uvssat rabas, logai Pulska.
Liikui oassálastet
– Lei hui suohtas go ledje bovden min deike, beasaimet muitalit min skearru ja musihka birra mo lea šaddan, logai Ravggon- joavkku lávlu. Ravggon joavku ii čuojahan Ijahis Ija lávddis dán jagi, muhto čuojahedje moadde bihttá sámemuseas seminára oassálastiide ja guldaledjiide.
Govven: Inga Marie Guttorm
Dehálaš fálaldat
Musihkaseminára lea lágiduvvon measta juohke jagi festivála oktavuođas ja seminára lágideaddji Anni Guttorm oaivvilda ahte lea dárbu ja dehálaš fállat seminára.
–Lea dehálaš go dáppe Suomas ii lágiduvvo sámi musihkaseminára muđuid, dahje ii gávdnu báiki gos musihkkárat sáhttet ságastit gaskaneaset ja guldaleddjin. Dan sivas lea dát dehálaš dáhpáhus, logai Guttorm.
Buoridanmunni
Vaikko seminárii eai lean boahtán nu ollu guldaleaddjit, de sii geat ledje boahtán orru bures čuovvumin mielde, ja muhtimat gaskkohagaid geavahedje vejolašvuođa gažadagaid divvut nuorra musihkkáriidda.
–Livčče dieđusge galgan vel eambbo nuorrat oasálastit. Mis lea buoridanmoni olahit eanet olbmuid iešguđet agis, logai Anni Guttorm.
Govven: Inga Marie Guttorm
Sámi musihka rievdan
Beakkán sámi multidáiddár Niillas Holmberg logai sámi musihkka lea rievdan maŋemuš viđá jagis. Son logai leat boahtán lassi musihkalaš vuogit.
–Sámis artistat hui johtilit fátmmastit máilbmi fenomenaide ja musihkalaš vugiide. Dan seammás go juoga dáhpáhuvvo Amerihkás, de dat fargga ihttá deikke maid, logai Holmberg.
Nanu dilli
Niillas Holmberg logai sámi musihkka leat hui nanu dillis.
– Bohttet olles áigge ođđa joavkut, ii olmmoš nagot čuovvot buohkaid. Lea hui buorre sámi musihkkii, logai son.
Divui gažaldaga ruovttoluotta
Niillas Holmberg maid vástidii gažaldahkii; «mii lea Sámi musihkka», mii lei sáminára váldo fáddá ja su vástádus lei ná:
– Lea go dan dárbbu meroštallat? Mun persovnnalaččat in leat dovdan dárbbu bidjat makkárge kássaid sisa musihkka, vástidii Holmberg semináras.
