Romssas áigot Sámi vahkku oktavuođas čuvget vuosttaš geardde Romssa gávpoga sámi ivnniiguin.
Gáisi giellaguovddáš, Midnight Sun Maraton ja Nordlysfestivalen háliidit čalmmustahttit sámevuođa ivdnečuovggaiguin Romssa gávpogis. Earret eará leat juo čuvgen Alfheim vuojadanbáikki, dieđiha Gáisi Giellaguovddáš preassadieđáhusas. Giellaguovddáža jođiheaddji John Niklas Labba muitala ahte álgojurdda bođii das go eai sáhte lágidit sámi vahkku no go dábálaččat Romssas, gos lávejit doalut miehtá vahkku ja almmolaš doalut ráđđeviesus Sámi álbmotbeaivvi.
– Eat sáhte čohkket olbmuid, muhto ii galgga sámevuohta dan dihte láhppot. Mii leat gávdnan eará vugiid čájehit sámevuođa, ja háliidit čuvget dakkár diŋggaid maid olbmot oidnet, dadjá Labba.
Sámevuođa čájehit
Son lohká ahte sin sávaldat leat oažžut oidnosii ahte Romsa lea sámi gávpot, earenoamážit go lea dat sadji gos otná dán beaivvi leat eanaš jienasteaddjit Sámedikki jienastanlogus.
– Mii háliidit váldit ovddasvástádusa nannet sámevuođa eanet, muitala Labba.
Que Professional AS lea mannan vahkkoloahpa Romssa suohkaniin, Gáisi giellaguovddážiin ja Fritids Audiatoriin ráhkkanahttán stuora ja šerres LED-installašuvnna mii govvida sámi leavgga Alfheim vuojadanbáikkis. Designa lea Lars Bjørgesæter ráhkadan. Sámi leavga čalmmusta sámiid, Sámi eatnama ja sámi ivnniid. Riekkis govvida beaivvi (ruoksadin) ja mánu (alidin). Fiskes ja ruoná ivnnit ges govvidit luonddu ja elliid. Guovvamánu 6. beaivvi Sámi álbmotbeaivvi čuvgejuvvo maiddái Fjellheisen ja ráđđeviessu sámi ivnniiguin.
