Mannan gaskavahku, borgemánu 26. beaivvi, galledeigga Ovddádusbellodaga stuorradiggeáirasat, Silje Hjemdal ja Himanshu Gulati, guktot bearaš- kulturlávdegottis, RiddoDuottarMuseaid ossodaga Sámiid Vuorká-Dávviriid Kárášjogas.
RiddoDuottarMuseaid direktevra ja Sámiid Vuorká-Dávviriid museahoavda Jelena Porsanger čilgiiga stuorradiggeáirasiidda, Silje Hjemdal ja Himanshu Gulati, dan váttis dili masa sámi museat leat šaddan koronaáigodagas go leat manahan bileahttavuovdin tietnasa, čállá RDM-SVD preassadieđáhusas.
Musea bargi guovttos čilgiiga sudno mielas vásihit sámi museat struktuvrralaš vealaheami dáža museaid ektui go eai oaččo doarjaga stáhtas gokčat iežaset vuolláibáhcaga korona-roasu dihtii nu mo dáža museat ožžot. Birgen dihtii leat sii bággehallan geahpedit mealgat iežaset ovddalgihtii gáržžes dábálaš bušeahta vai ii šatta vuolláibáza.
Stuorradiggeáirras Silje Hjemdal logai iežas áddet dili, muhto RiddoDuottarMuseain vurdet ahte eiseválddit čuovvulit ášši vai dilli buorránivčče. Muđui beasaiga Stuorradikke áirasat Hjemdal ja Gulati oaidnit Sámiid Vuorká-Dávviriid čoakkáldaga ja čájáhusaid.
