Dat lea hušša viessoeaiggádiin geat áigot láigohit olbmuide viesuideaset Finnmárkkus. Eai leat unnán olbmot geat dárbbašit orrunsaji čavčča rájes.
Børge Martinussen lea orrunsajiid geavaheaddjiorganisašuvnna Huseierne jođiheaddji, ja sus leat rávvagat mo čoavdit daid dábáleamos váttisvuođaid go láigoha olbmuide orrunsaji.
– Dábálaččat manná bures láigodilálašvuođain, muhto ii álo. Danne lea dehálaš ahte don dagat buot riekta álggu rájes juo. Nu sáhtát garvit váttisvuođaid, dadjá Børge Martinussen, orrunsajiidjođiheaddji Finnmárkkus.
Martinussen rávve viessoeaiggáda geahččat láigoheaddji referánssaid, gáibidit depositumma ja ráhkadit čálalaš láigošiehtadusa. Son ii ávžžut láigoheaddji máksit depositumma dábálaš kontui. Ávžžuha láigoheaddji geahččat báikki ovttas viessoeaiggádin, beassá govvestit jus juoga váilu dahje lea billehuvvan.
Čieža rávvaga mat váikkuhit vai buore oktavuohta bissu:
Dárkkis referánssaid láigoheaddjis ovdal šiehttabeahtti maidege.
Muitte ráhkadit láigošiehtadusa. Geavat áinnas gárvves ráhkaduvvon šiehtadusa.
Muitte čállit ja/ dahje govvet, jus juoga lea billahuvvan dahje/ja jus juoga váilu, de ii šatta láigoheaddji sivva.
Depositumma sihkkarastte viessoeaiggádii vai ii manat láigoruđaid jus láigoheaddji dattege ii mávsse viessoláiggu.
Ferte čielggas leat man guhká oažžu láigohit ássodaga/viesu.
Dárkkis ahte kontrávttas čuožžu láigoheaddji sáhttá bálkestuvvot olggos jus ii mávsse viessoláiggu.
Loga rivttiid ja njuolggádusaid birra. Ii sáhte ovdamearkka dihte bajidit viessoláiggu oktii jahkebealis nu ahte it leat addan dieđu láigoheaddjái.
