– Sáttu ja čievra ihttá go muohta suddá. Dálvejuvllat bálkestit unna geađggážiid mat girdet dego luođat johtolagas go bidjala leahttu biillain, dadjá NAF kommunikašuvdnaráđđeaddi Nils Sødal.
Dáhkádussii dieđihuvvojit biilalásecuovkaneamit ja leat lassánan badjelaš 100 000:in logi jagis 2007 rájes, čájehit Finans Norge logut. 2007:s ledje 154 104 lásevahága dieđihuvvon, ja logi jagi maŋŋel lei dat lohku 256 974, čállá NAF preassadieđáhusas.
Ávžžuha váruhit
Giđđa lea dat áigi go lásiide eanemusat šaddet mearkkat. Dálvedeahkaide, main lea dipma gummi, darvánit unna geađggážat go muohta suddá.
Go leahttu badjána, de luovvanit unna geađggážat ja girdet olles leahtuin biillaid njeaiga, mat leat du maŋábealde vuodjime.
Kommunikašuvdnaráđđeaddi Nils Sødal sihtá biilavuddjiid váruhit, ammes eai vuoje beare lahka nuppi biilla.
Divot jođánit
Jus dáhpáhuvvá mihkkege mii billista biilaláse, de fertet čoavdit ášši nu jođánit go sáhtát ja divvut dan. Jus dus lea kasko- dahje oassekasko dáhkádus, de lea áibbas nuvttá divuhit daid mearkkaid.
– Unna mearkkaš láses sáhttá stuorrut jođánit. Dat lea dárbbatmeahttumis ášši man ovddas gártá máksit, lohká Sødal.
Ovdaláse biillas lea dehálaš divvut, go dat lea oassin doallame biilla čoahkis.
Gohččot eiseválddiid čorget
NAF ávžžuha maid eisseválddiid doallat luottaid čorgadin.
– Biddjet čorgenbiillaid čorget luottaid nu jođánit go vejolaš. Lea fiinnis go luottat leat ráidnasat miessemánu 17.beaivvi rádjái, muhto biilalásiid billahuvvama ektui lea dat beare maŋŋit. Lea dehálaš go muohta suddá čorget luottaid, vai geađggážat eai billis biilalásiid, lohká Sødal.
