Unjárgalaččat jienastedje ikte galget go ovttastuvvot Mátta-Várjjagiin dahje Deanuin. Boađus čájeha ahte dan eai hálit gal.
Unjárgalaččat jienastedje ikte galget go ovttastuvvot Mátta-Várjjagiin dahje Deanuin. Boađus čájeha ahte dan eai hálit gal.
70 proseantta sis geat jienastedje, háliidedje Unjárgga bissut sierra gieldan, nu mo lea leamaš 1800-logu rájes.
Badjel bealli jienastan
Ifinnmark dieđuid mielde jienastedje 30 proseantta ahte háliidit ovttastuvvot. Unjárggas leat vuollel 1 000 ássi. 51 proseantta dain, geain lea jienastanvuoigatvuohta, jienastedje dán álbmotjienasteamis.
Supervuossárga
Ikte lei nubbi, golmma vuossárggas go dát álbmotjienasteamit čađahuvvojit Norggas. Dáid vuossárggaid leat gohčodišgoahtán supervuossárgan, go leat nu máŋgga gielddas jienasteamit oktanas.
Finnmárkkugielddain jienastedje ikte Hámmárfeasttas, Várggáin, Unjárggas, Fálesnuoris ja Muosáin áigot go ovttastuvvot eará gielddaiguin.
Muosáin maid čielgasit hilgo ovttastahttima, eará suohkaniin eai leat seamma čielga bohtosat.
Eai jienas Kárášjogas ja Guovdageainnus
Vuossárgga, miessemánu 23. beaivvi, jienastedje 31 gieldda háliidit go ovttastuvvot. Oktiibuot galget 162 gielddas čađahuvvot jienasteamit.
Vuossárgga miessemánu 30. beaivvi, jienastedje 44 gielddas. Viđa gielddas ledje jienasteamit miessemánu 29. beaivvi.
Kárášjogas ja Guovdageainnus galget maid mearridit háliidit go ovttastahttot, dáin gielddain dattetge eai čađat jienastemiid muhto álbmotčoahkkimiid. Miessemánu 31. beaivvi lea álbmotčoahkkin Guovdageainnus. Geassemánu 1. beaivvi Kárášjogas.
