Beakkán norgalaš artista Lene Marlin rámida Agnete Johnsena, go lea válljen ahte ii searvva jearahallamiidda Eurovision finálaid ovdal.
Beakkán norgalaš artista Lene Marlin rámida Agnete Johnsena, go lea válljen ahte ii searvva jearahallamiidda Eurovision finálaid ovdal.
Romsalaš artista Lene Marlin, guhte maid nuorran beakkehii miehtá máilmmi artistan, ja guhte rahpasit lea muitalan iežas mentála váttisvuođaid birra, rámida dál Agnete Johnsena.
– Dál čohkká okta nieida Stockholmmas, gean birra hirbmasit jurddašan. Čeahpes, duostilis Agnete! Dat maid son dahká lea nu buorre ja nu riekta. Son steŋge visot rieja olggobeallai, nu bures go nagoda. Son váldá iežas dárbbuid vuhtii, ja seastá návccaid, čállá Marlin iežas Facebook-siiddus.
Ii leat searvan masage
Maŋimuš vahkkuid lea Agnete birra beaggán medias go mentála sivaid geažil lea válljen ahte ii searvva eará Eurovision doaluide go oassefinálii ja finálii, jus beassá dohko, iige atte jearahallamiid. Olusat leat moaitán su dán ovddas ja gažadan ahte lea go dát rivttes dahku.
Lene Marlin, guhte ieš lea ráhčan lossa jurdagiiguin ja rahpasit muitalan dan birra, gal bealušta Agnete guhkes čállosis man lea almmuhan iežas almmolaš Facebook-siiddus.
– Leat álot muhtin olbmot geat eai ádde. Olbmot geat moitet ja «jierpmálaččat» rávvejit bissut eret musihkas ja almmolašvuođas. Muhto ii olmmoš dárbbaš heaitit čuovvumis nieguidis dušše danne go oaivi ii álot čuovo mielde. Dat lea dehálaš! Lagabui bealli Norgga álbmogis vásiha psykalaš váttu eallinagis. Dat leat olus, čállá Marlin.
Rahpasit muitalan
Marlin ieš oaččui Se og Hør bláđii «Dán jagi ovdagovva» bálkkašumi 2014:s, maŋŋil go lei rahpasan iežas váttuid birra mediaid bokte.
– Ii leat hearkivuohta muitalit ahte rahčá psykalaččat! Dat gáibida erenoamáš duostilvuođa, erenoamáš givrodaga. Mii leat buohkat hearkkit. Gievrras olbmot dustet čájehit ahte sii leat hearkkit. Mii fertet váldit vára alddámet ja guđetguoibmámet, čállá Marlin.
– Dahket visot riekta
Lene Marlin čállá ahte ii beroš vuoittáš go Agnete vai ii, su mielas unjárnieida lea jo fiinna ovddasteaddji Norgii, ja dán áigái mas eallit.
– Mii eat sáhte álot stivret dan mii dáhpáhuvvá midjiide ja min eallimiid. Mii eat sáhte «timet» heajos bottuid nu ahte dat bohtet dalle go midjiide heive. Ja earáide. Dat eai čuovo TV-kánalaid sáddenskoviid dahje áviissaid áigemeriid. Dat bohtet veahá dego siiddus. Muhtumin njága, muhtomin dego huškkastat ámadadjui, čállá Marlin ja sávvá lihku Agnetii:
– Olu lihkku Agnete! Juohke ládje! Jus vuoittát, de galggat diehtit ahte dahket visot riekta. Jus it vuoitte, de galggat diehtit ahte dahket visot riekta. Nu guhká go dagat dan mii alccesat lea riekta, ja jeagadat iežat siskkit jiena. Du jietna dat galgá dávistit, duppal mearkkašumis.
