Ođđa njuolggadusat dálvedeahkaid hárrái bohtet fápmui skábmamánu 1.beaivvi.
Dá lea njuolggadus mii guoská stuora gálvobiilladeahkaide mat fertejit leat merkejuvvon 3PMSF. Ovddabeale akselis ja juvllain mat jođihit dat galgá dákkár mearka. Muđuid leat eará deahkaide gáibádus ahte lea M+S-mearka dain. Minsttarčikŋodat galgá ain leat seamma ollu go ovdal, mii lea 5 millimehtera.
Njuolggadusat almmuhuvvojedje diibmá, ja lea leamaš olles jahki guorbmebiilafitnodagaide heivehit fievrruid ođđa njuolggadusaide.
– Mii sávvat ahte dálveluottat šaddet vel eanet oadjebassan, lohká Stáhta geaidnodoaimmahaga jođiheaddji Kjetil Wigdel.
Son deattuha ahte eanaš guorbmebiillat mat vudjet dálveluottaid alde leat buori ortnegis.
– Mis lea buorre ovttasbargu guorbmebiillaiguin, ja vásihan ahte eatnašiin lea buot ortnegis, muhto nu go olu báikkiin servvodagas, de lea unnibuš oassi mii billista ollislašgova.
