Sámi sotnabeaivedoaluin Romssas čalmmustahttet Ruošša eamiálbmogiid dálá dili, lassin duodje- ja bivttasčájáhusaide.
Sámi sotnabeaivedoaluin Romssas čalmmustahttet Ruošša eamiálbmogiid dálá dili, lassin duodje- ja bivttasčájáhusaide.
Sámi sotnabeaivi lágiduvvo Romssas boahtte sotnabeaivvi, ja lea álgun sámi vahkkus mii lágiduvvo Romssas. Mánáide lea šielladuddjon, muđuid lea logaldallan Ruošša eamiálbmogiid birra, girjealmmuheapmi sámi ornamentihka birra, Kola-sámi bivttasčájehallan ja Kola duodječájáhus.
– Mii háliidit čalmmustahttit Ruošša beale sámiid dili, ja konkrehtalaččat dujiin ja sámi biktasiiguin, muitala vuosttašamanueansa Ivar Bjørklund, geas lea sámi sotnabeaivvi doaluid fágalaš ovddasvástádus, mat lágiduvvojit juohke jagi Romssa museas.
Šiellaráhkadeapmi mánáide
Mánát besset ráhkadit guovžašiela ja lea duojár Sáve designas Jorunn Løkvold gii oahpaha. Guovžašiella, man mánát besset ráhkadit, lea oaivaduvvon Dolganer eamiálbmogiin, geat ásset Tajmyr-njárggas Davvi-Sibirjás. Šiela lea dábálaš atnit veaskkuin go leat mátkkis vai suddje sisdoalu ja vai ii okta ge suolát veaskku sisdoalu. Guovžža juolgi govahallá bassi ealli mas lea garra fápmu, ja ráigeminsttar čoarvvis govahallá nástealmmi.
Ruošša dálá dilli
The Russian Association of Indigenous Peoples of the North (RAIPON) ovddit várrepresideanta Dmitry Berezhkov logaldallá Davvi-Ruošša eamiálbmogiid dálá dili birra. Berezhkov lea maiddái ožžon politihkalaš dorvvu Norggas.
Girjealmmuheapmi
Davvi-álbmogiid guovddážis Murmánskkas boahtiba Anastasia Mozolevskaia ja Ekaterina Mechkina, geat almmuheaba «Sami Ornaments» mii lea girjji eaŋgalas veršuvdna.
Lujávrilačča Elvira Galkina dikta «sámi hearva» maid lohkko gielddasámegillii, davvisámegillii ja dárogillii.
Doalut álget diibmu 12:is Romssa museas. Doaluin leat maid Ruošša duojit oastin ládje dieđihuvvo preassadieđáhusas.
