Sámi Našunálateáhter lea ruhtadan dánsenčájálmasa mii lea earret eará oaiveliidnegeavaheami birra ja maid dat dagaha hijab geavaheapmái.
Mii sáhttá nissonolmmoš leat? Lea go dálá servodagas juoidá manin son ii máhte dahje sáhte leat? Gávdno go nissonlaš ja olmmáivuođa dánsun ja mii dáhpáhuvvá Norgga álbmotdánssa sohkabealrollain go nissonolmmoš 2020:s beassá neaktit goappaš rollaid ja maiddái daid árjjaleamos «olmmáivuođabihtáid»? čuožžu preassadieđáhusas man Sámi Nášunálateáhter lea sádden.
Dehálaš dahkat vejolažžan dáiddalaš buktaga
– Sámi Našunálateáhter ovttasbargá buvttadit iešguđetge čájálmasaid iešguđetge buvttadeddjiiguin. FRIKAR oktavuođas de leat addán ruhtadeami buvttadeapmái go mii háliidat iskat dánssa čájehanvuohkin. Nu ahte mis lea buorre ovttasbargu dánssas, musihkas ja teáhteris. Mii leat válljen daid áššiid mat čájehit dáiddalaš ovdáneami ja mat dagahit ahte mii boahtit oidnosii. Mii leat oassin stuora nationála eurohpalaš teáhteroktavuođas, dadjá teáhterhoavda Rolf Degerlund.
Son muitala ahte sis leat olu prošeavttat main ovttasbarget earret eará Norgga teáhteriin.
– Lea dehálaš ovttasbargat eará buvttadeddjiiguin, lea movttiidahtti ja seammás dagahat ahte leat oidnosis iešguđetge oktavuođain. Ja ovttasbarggut sáhttet leat veahaš mo ge, sáhttá leat olu dahje unnán, muhto lea dehálaš dahkat vejolažžan dáiddalaš buktaga, dadjá Degerlund.
Iská oaiveliinni geavaheami
Koreográfa ja FRIKAR ráhkadeaddji Hallgrim Hansegård ja vihtta dánsejeaddji leat ráhkadan čájálmasa mas lea fáddán rupmaša dárkkisteapmi, gárvodeapmi ja bearráigeahččan.
Oaiveliidni lea geavahuvvon friddjavuođa ohcamii ja maiddái dárkkisteapmái Norggas. Sáhttet go Norgga árbevirolaš biktasat ja lihkasteamit dagahit ođđa oainnu dán áigásaš hijab-geavaheapmái? Dan háliida koreográfa čájehit čájálmasas.
Čájehuvvo moatti sajis Finnmárkkus
Vuosttaščájálmas lea Bæruma kulturviesus guovvamánu 28. beaivvi. Eará dáhtonat goas SKAUT čájehuvvo lea Borealis dálvefestiválas Álttás njukčamánu 6. beaivvi, Hámmárfeasttas njukčamánu 10. beaivvi ja loahpas Spållavuolles (Svolvær) njukčamánu 13. beaivvi.
FRIKAR lea dánsenkompaniija man álggahii Hallgrim Hansegård 2006:s Kompaniija ovttastahttá dálááiggidánsuma Norgga boares árbevieruin, ja lea oaivugas dánsenkompaniija dán šáŋŋeris.
FRIKAR lea dáinna dánsenčájálmasain vuosttaš geardde geavaheamen dušše nissonolbmuid čájálmasas. Dán čájálmasas lea nissonrolla Norgga álbmotdánsemis guovddážis.
