Máŋga duháha olbmo Nuorta-Finnmárkku rittus leat jándora jo leamaš telefuvnna ja interneahta haga. Dat dattetge lea mannan bures dássážii, go eai dieđihuvvo makkár ge duođalaš dáhpáhusat diein guovlluin.
Váldofiberkabel lea boatkanan ja dagahan ahte telefon- ja interneahttafierpmádat ii doaimma stuorra osiin Nuorta-Finnmárkkus.
Jaskes idja
Finnmárkku politiijaguovlu duođašta gaskavahku iđida NTB:i ahte lea leamaš jaskes idja, eai ge leat leamaš duođalaš dáhpáhusat.
Finnmárkku Fylkkamánni fylkkagearggusvuođahoavda Ronny Schelderup muitala maid ahte lea leamaš jaskat.
– Mis lea dál iđđedis leamaš čoahkkin gielddaiguin, politiijain, 110-guovddážiin ja AMK:in ja sáhttit duođaštit ahte lea leamaš jaskes idja, lohká Schelderup NTB:i.
Odne divvot
Son lohká divvumiid álggahuvvot ovdalgaskabeaivvi.
– Lea váttis dadjat man guhká ádjánit. Dálki, biegga ja man sakka kabel lea billašuvvan dat váikkuhit bargui. Mis lea doaivva ahte čoavdašuvvá beaivvi mielde. Mii vuordit eambbo dieđuid Telenoras dán birra, lohká Schelderup.
Mearraheahtefierpmádat iige doaimma
Fierpmádat váttisvuohta lea bistán maŋŋebárgga iđida rájes, ja politiijat ja Báhcavuona ja Bearralvági dearvvašvuođasuorggis leat birrajándor barggus veahkehan dihte olbmuid.
Kabelboatkaneapmi lea maid dagahan ahte fanasrádiot eaige doaimma, mii mearkkaša ahte mearraheahtefierpmádat ii ge doaimma dien guovllus.
Báikkálaš politiijat gulahallet Girkonjárgga operašuvdnaguovddážiin satelihtta-telefuvnnaid bokte.
(©NTB)
