– Buoremus jus lubmejeaddjit vuššet káfe ruovttus

Sámis leamaš árbevierru go olbmot mannet lubmet, de gullá maid dolastallan luome­čoaggimii.

 Kárášjoga sadjásaš gielddalaš jođiheaddji, Helge Nystad, rávve olbmuid leat várrugasat dál luomeáiggi. 

– Buoremus lea jus olbmot sáhtášedje vuoššat káfe ruovttus, eai ge dolastallat dál. Eana lea nu goikkis ahte jođánit sáhttá leavvat viidásabbot. Jus dattetge háliida dolastallat, de dahkat dan johkagáttis dahje guovllus gos dolla ii beasa leavvat dobbelii. Go lea geargan dolastallamis, de galgá jáddadit dola valjis čáziin ja njuoskadit eatnama vuđolaččat dollasaji birra. Dolla sáhttá mannat ruohttasiid mielde, cahkat eatnamis ja buollát maŋŋá, čilge Helge Nystad.