Lávvardaga čuovganeapmái buollái Várggáin okta mearrarusttetvisti káija alde, das hirbmosit viidánii suovva ja váruhedje leavvat. Birrasii 15 vistti evakuerejuvvo ja njealjis ožžot dálkkodeami go leat vuoigŋan suova.
Buollin álggi ovtta mearrarusttetvuorkkás Strandgatas Várggáha guovddážis ja buollin dieđihuvvui ovdal dii.03.00 lávvardaga čuovganeapmái. Finnmárkku politiijat dieđihit ahte lei garra oarjedavádat biegga go visti buollái ja dat mielddisbuvttii ahte biegga doalvvui suova njuolga Várggáha guovddážii.
– Dássážii leat 15 viesu evakuerejuvvon, dan leat politiijat, ambulánsa ja siviilasuodjalus čađahan. Avinor lea veahkehan báikkálaš buollinveaga, čállet Finnmárkku politiijat Twitteris.
Dárbbašedje dálkkodeami
Njealjis ožžot dálkkodeami doaktáris dearvvašvuođaguovddážis maŋŋel go leat vuoigŋan suova.
– Dat lea okta politiijabálvá, guovttis Suodjalusas ja okta siviilaolmmoš, dadjá Finnmárkku politiija operašuvdnajođiheaddji Tarjei Leinan Mathiesen NTB:i lávvardaga iđida.
Kontrolla buollimis
Finnmárkku 110-guovddáš dieđihit buollinveagas lea kontrolla buollimis.
– Buollinveagas lea kontrolla dilálašvuođas ja sii leat dál dušše čuovvumin dili, dál ii leat šat nu olu eará maid sáhttá dahkat, dadjá Finnmárkku 110-guovddáža operatevra Christian Eriksen.
