Muhto Guovdageainnu Bargiidbellodat ii leat vel vuollánan oažžumis sihkkaris saji ođđa fylkadiggái.
Muhto Guovdageainnu Bargiidbellodat ii leat vel vuollánan oažžumis sihkkaris saji ođđa fylkadiggái.
Finnmárkku ja Romssa Bargiidbellodaga nammadanlávdegoddi lea loahpalaččat árvalan listtu čavčča fylkkadiggeválgii.
Sin listu lea ná:
1. Gáivuotnalaš ja fylkkaráđi jođiheaddji Bjørn Inge Mo
2: fylkkasátnejođiheaddji ja davvinjárgalaš Kristina Hansen
3: fylkkavárresátnejođiheaddji ja hámmárfeastalaš Tarjei Jensen Bech
4: Sigrid Ina Simonsen, Hársttáin
5: Tor Inge Hoaas, Romssas
6: Kristin Rajala, Deanus
7: Bjørn Johansen, LO
Ii vuollánan beassamis bajás
Ávvir čálii dán vahkus Guovdageainnu Bargiidbellodaga birra mii vuordá sihkkaris saji Sis-Finnmárkku áirasiidda ja danne árvalit iežaset bellodatjođiheaddji Isak Mathis Buljo 11. sadjái.
Muhto nammadanlávdegotti listtus lea Buljo 39. sajis.
Kárášjoga áirasat leaba Eldbjørg Mathisen, 22. sajis, ja Marit Kirsten Gaup, 46. sajis.
– Eat leat duhtavaččat. Min ulbmil lea sihkkaris sadji Sis-Finnmárkui, ja 22. sadji ii ge leat sihkar. Vuosttaš guoktelogi leat dušše oalle sihkkarit siste. Eai soaitte nu olu ge, muhto de lea goit bures mannan válggas Bargiidbellodagain. Muhto mii áigut ain bargat, ii ge leat vel daddjon nie dat šaddá. Nammadanlávdegottis leat goit min ákkat, dadjá Isak Mathis Buljo.
Loahpalaš nammadančoahkkin lea Álttás njukčamánu 24. beaivvi.
Ávvir ii ožžon nammadanlávdegotti jođiheddjid ságaide.