Vaikko «Trøndersk Matfestival« ii lágiduvvo Troandima guovddážis nu mo ovddit jagiid, de lágiduvvojit báikkálaš borramušfestiválat miehtá Trøndelága vuosttaš vahkkoloahpa borgemánus.
Borramušfestivála «Trøndersk Matfestival» lea maŋimuš jagiid čohkken olu guovllu olbmuid Troandima guovddášmárkanii, nu mo diibmá go bohte 225.000 olbmo. Koronagáržžidemiid dihtii lágidit Trøndersk Matfestival dán jagi doaluid miehtá Trøndelaga, dieđiha Trøndelága fylkkamánni preassadieđáhusas.
– Mii searvat maid dán jagi. Leat birrasii 10-15 fitnodaga mat bohtet Plassje márkanii dán vahkkoloahpa. Vaikko min fitnodagas lea uhccán bohccobiergu dál, de jurddašin vuovdalit goikaduvvon bohcconjuokčama. Dan eat leat geahččalan ovdal. Vuovdit maid goikebierggu, spihkenmárffi mii lea ráhkaduvvon dušše bohccobierggus, suovas ja cáhppojuvvon bierggu, muitala Rørosrein AS fitnodaga eaiggát Eva Nordfjell Ávvirii.
Vuođđun Rørosrein AS fitnodahkii lea Eva Nordfjell ja su vielja bohccot. Eva Nordfjell muitala sii leat dál mearkumin misiid ja jáhkimis sii gerget áiggil borramušmárkaniidda.
