Jielleváre guovllus Ruoŧas leat skutervuoddjit illástan bohccuid ja sii leat filbmen daguid rámpoma dihte. Boazodoallit leat váidán máŋga dáhpáhusa dál politiijaide.
Jiellevári vuovdečearru boazodoalli Lars-Thomas Persson (43) ii loga iežas báljo ožžon nahkáriid mannan ija, go oinnii filmma man muhtin lea bidjan nehttii. Das oaidnit go muhtin lea ožžon gitta bohcco ja juohke háve go boazu galgá ruohtestit, de fas čohkkeda dan ala ja njuvdá dan. Filbma lea biddjon youtubei juo guhtta jagi áigi, cuoŋománus 2009.
– Gal dat lea juo issoras. In ipmir movt oba sáhttet ge elliid ná illástit. Ii leat šat somá johttát giđđabáikái ge ealuin, go oainnán govain ahte doppe dat barget dieid, ja doppe leat ge dat olu skuterat maid giđđat, dadjá Persson.
Govaiguin rámpojit
Filbma mas dat olmmoš njuvdá bohcco, lei odne váldon eret neahtas, muhto Persson háhppehii filbmestit dan video dihtoršearpmas. Geahča video dás vuollelis
Boazodoalli lea maid gávdnan gova mas muhtin lea skuteriin vuodján bohcco badjel ja govvestan vel. Govas oaidnit go boazu lea skutersabeha vuolde. Dat govva lea ollusiid eaddudan sosiála mediain.
Vuodján čorraga badjel
Persson ii loga dákkáriid dáhpáhuvvat dušše sin čearus. Maiddái Girjás, Baste, Unna čeroš galget leat vásihan ahte olbmot fallehit bohccuid meahcis. Son muitala ahte ránnjáčearus leat gávdnan bohccuid maid badjel soames lea vuodján skuteriiguin. Girjás čearus ledje vuodján čorraga badjel skuteriin, ja 11 bohcco ledje dáinna lágiin goddon ovdal go bahádahkkit njuvve daid.
Ballet muitaleames
Persson ii loga olbmuid duostat dieđihit dákkár daguid, go ballet ráŋggáštuvvot. Son lea ieš odne váldán oktavuođa politiijaiguin ja lea váidán daguid. Sus leat namat maid addá politiijaide, go 2009 filmma lea dihto olmmoš bidjan nehttii. Perssona su dieđuid mielde galget politiijat álgán bargat áššiiguin.
Olu vašuheaddjit
Lars-Thomas Persson lohká Jiellevári guovllus leat erenoamáš ollusat geat vašuhit bohccuid ja sápmelaččaid.
– Dáppe lea hui dábálaš dat oaidnu, dađi bahábut. Lea juo olggobeale olbmuid hupmanmálles ahte galgá vašuhit bohccuid ja sápmelaččaid. Dán eat sáhte šat dohkkehit, ja fertet juoidá bargat vai dakkár oaidnu ii beasa šat viidábut leavvat. Mun in vuollán ovdal go bahádahkkit leat váldon, dadjá Persson.
Son ávžžuha politihkkáriid dál gullát, ja luvvet návccaid vai politiijat čovdet dáid áššiid jođánit.
Gáibidit návccaid luvvet
Ruoŧa Sámi Riikkasearvi (RSR) gáibida dál ahte eiseválddit bidjet návccaid čoavdit rihkusáššiid.
– Elliid biinnidit dáinna lágiin, go dál lea fuomášuvvon, lea áibbas dohkketmeahttun, dadjá RSR ságadoalli Jörgen Jonsson preassadieđáhusas.
Dál ávžžuhit politiijaid ja leanastivrra bargat áššiiguin mat juo lea dáhpáhuvvan, vai eai dáhpáhuvaše šat..
– Lea erenoamáš dehálaš ahte servodat ja servodatnjunnošat čájehit čielgasit ahte dat mii dál dáhpáhuvvá, ii leat dohkálaš, ja bidjet áiggi ja návccaid gálgat áššiid, dadjá Jörgen Jonsson.
