Frostating Lágamánneriekti dubmii boazodoalli guđa mánnui eavttuhis giddagassii maŋŋel go bážii golbma guovžža Lijres diibmá.
Boazoeaiggát dubmehalai njukčamánus gávcci mánnui evttolaš giddagassii ja oaččui guokte jagi geahččalanáiggi Trøndelága diggegottis. Sihke boazoeaiggát ja áššáskuhtti eiseválddit guoddaledje duomu ja vuossárgga dubmii Frostating Lágamánneriekti dievddu guđa mánnui eavttuhis giddagassii, čállá Rovdyr.org neahttasiidu.
Boazoeaiggát oaivvilda ahte bážii guovžža oktan čivggaiguin heahtegádjumis. Boazoeaiggát lei máŋga beaivvi viggan ovttas Stáhta Luonddubearráigeahčuin vuojehit eret guovžžaid mat bahkkejedje ealo sisa guottetbáikkis.
Boazoeaiggát lei moadde beaivvi ovdal ohcan báhčinlobi, muhto dán ii lean ožžon.
Boazoeaiggáda bealušteaddji, advokáhtta Brynjar Meling, muitala ahte guoddaleaba duomu Alimusriektái. (©NTB)
