Boazodoalu lávejit muhtimat lohkat goazadit olu ovdánemiid, dál dutkit lohket dan goazadit maid ovdánemiid mat eai leat buorit, nammalassii dálkkádatrievdamiid.
Boazodoalu lávejit muhtimat lohkat goazadit olu ovdánemiid, dál dutkit lohket dan goazadit maid ovdánemiid mat eai leat buorit, nammalassii dálkkádatrievdamiid.
Boazodoallu lea dehálaš ealáhus ja guovddáš oassi sámekultuvrras davvi Fenno-Skandias. Dát ealáhus sáhttá maid leat mielde goazahit dálkkádatrievdamiid váikkuhusaid árktalaš guovlluin.
Duottarguovllut goazadit dálkkádatrievdamiid
Boazodoallu erenoamážit váikkuha birrasii ja erenoamážit duoddariid ekosystemii. Dat eastada miestagiid ja muoraid šaddamis rabas duottareatnamiidda, ja nu goazada dan rievdadusa man dutkit navdet boahtit dálkkádatrievdamiid geažil, nammalassii ahte duottareatnamat vesáluvvet.
– Duottarguovllut, gos leat vuollegis šattut, bissot muohttaga vuolde guhkit go vuovdeguovllut, danne go muorat absorberejit beaivesuotnjariid ja dagahit ahte muohta suddá jođáneappot. Muohtaduoddarat ges sáddejit stuorát oasi beaivesuotnjariin ruovttoluotta gomuvuhtii ja hehtte daid váikkuheames eatnama dálkkádahkii, nu dat cakkada dálkkádatrievdamiid, lohká professor Lauri Oksanen, Turku universitehtas. Son lea TUNDRA guovddáža dieđalaš jođiheaddji.
Čoahkkanit Roavvenjárgii
Boazodoallit, dutkit, virgeolbmot, láhkadahkkit ja eará guovddáš olbmot Norggas, Ruoŧas ja Suomas čoahkkanit digaštallat boazodoalu boahtteáiggi ja dan rolla rievdi máilmmis.
Dát dáhpáhuvvá Roavvenjárggas golggotmánu 15. ja 16. beaivvi. Symposia leat gohčodan «Mo seailluhit duoddariid go dálkkit liegganit».
Davviriikkalaš ekselleansa guovddáš TUNDRA (Nordic Centre of Excellence TUNDRA) buktá dieđalaš dieđuid mat dorjot boazodoalu heiveheami dálkkádatrievdamiidda ja dálkkádatrievdamiid eastadeami árktalaš guovllus.
– Boazodoallu lea dakkár guovlluin gos maiddái eará eanageavaheaddjit leat, nu mo turisma, ruvkkit ja vuovdedoallit. Dát gáibida ahte boazodoalu geahččá máŋgga bealis, sihke luonddu ja olbmuid bealis, masa gullet de maiddái mávssolaš ovdamunit kultuvrraide ja ekosystemaide ja ceavzilis eanangeavaheapmi, čállá TUNDRA guovddáš preassadieđáhusastis.
