Dán erenoamáš girjjis «Muitalusat”, mii dál almmuhuvvo, leat boarráseamos davvisámegielat teavsttat maid sápmelaččat leat čállán sámegillii.
Jáhkoš Lásse (Lars Jacobsen Hætta, 1834–1896) ja Máiza-Bier Ánte (Anders Pedersen Bær, 1825–1882) muitaleaba dán girjjis Guovdageainnu dilálašvuođa birra ovdal moriidusa ja morráneami vuolde. Soai čálliba boazosápmelaččaid eallima ja oskku birra ja sin deaivvademiid birra Norgga ja Suoma eiseválddiiguin ovdal Guovdageainnu stuimmiid 1852:s.
Hætta ja Bær giehtačállosat leat boarráseamos teavsttat maid davvisámegielagat leat čállán. Soai leigga ovttas Jens A. Friisain ásaheame davvisámi čállingiela. Giehtačállosat leat dán girjái transkriberejuvvon ođđasit, ja girjjis leat maid kapihttalat mat eai leat ovdal almmuhuvvon sámegillii.
Sudno čállosat leat dahkan vejolažžan guorahallat boazosápmelaččaid jurddašanmálle, eallinvuogi ja giela dan áiggis goas eai gávdnon eará sullasaš gáldut. Girjjis leat golbma artihkkala mat meannudit dáid áššiid. Artihkkaliid leat čállán Ivar Bjørklund, UiT Norgga árktalaš universitehtas ja Nils Oskal ja Johanna Johansen Ijäs, Sámi allaskuvllas.
Hætta ja Bær čállosiid lea Harald O. Lindbach jorgalan dárogillii, namain «Erindringer».
