Per Stian Sara jođiha turismafitnodaga Tromsø Lapland, Romssa gávpogis. Bivvalis skábma lea dagahan roasuid su fitnodahkii, go ii sáhte herggiiguin vuodjit bievlan.
Per Stian Sara jođiha turismafitnodaga Tromsø Lapland, Romssa gávpogis. Bivvalis skábma lea dagahan roasuid su fitnodahkii, go ii sáhte herggiiguin vuodjit bievlan.
Per Stian Sara fitnodat Tromsø Lapland fállá turisttaide sámi kultuvrra ja biepmu.
Turisttat Romssas besset gullat sámi kultuvrra ja historjjá birra, muhto váldodoaibma lea heargevuodjin.
Turisttat besset heargeráiddus čohkkát, muhto eai dán skápma.
Roassu
Tromsø Lapland jođiheaddji Per Stian Sara muitala ahte bivvalis skábma lea dagahan roasu fitnodahkii. Romsii ii leat muohta vel boahtán, ja odne leat šaddan bissehit heargevuodjindoaimma.
Diibmá sii álge gaskamutto skábmamánu juo herggiiguin vuodjit. Dál sii lea ain vuordime muohttaga.
Veaháš muohta gal lea leamaš, muhto go dál nu sakka bivaldii, de suttai buot.
Fitnodagas lea heargevuodjin váldodoaibman, ja muitala olu turisttat illudit herggiid oaidnit.
– Dál juovllaid áigge lávejit juovlagahpirat oaivvis go bohtet, ja áigot govvedit herggiiguin. Turisttat lávejit hui duhtavaččat go besset vuodjit herggiiguin. Dál in dieđe maid dál lohket, dadjá son.
Čuohcá fitnodahkii
Sara muitala ahte sii áigot geahččalit fállat juoidá eará turisttaide, muhto masset olu dietnasa dan geažil. Fitnodagas leat lagabui logi bargi.
– Dát ii leat fávdnát, dat čuohcá buohkaide. Soaitit šaddat permitteret bargiid.
– Muhto leat earát maid geat vaháguvvet, beanavuodjinfitnodagat eai ge beasa vuodjit go ii leat muohta, lohká son.
– Čoavdit juoga ládje
Fitnodagas leat guokte báikki gos turistejit. Romssa sullos sis lea lávvu gos muitalit sápmelaččaid birra, ja guossohit biepmu. Sállira bealde lea fas báiki gos hearggástallet.
Per Stian Sara muitala ahte sii smávvát álge juo 2009:s dáinna bargguin, muhto dál lea viđat dálvi go hearggástallet. Son ii leat ovdal vásihan dákkár bivvaliid.
Sara lea sávvan borgga boahtit, muhto Romssas leat leamaš lieggaceahkit, ja lea dušše arván. Son lea juo ráhkkanan ahte guossit celket eret diŋgojumiid.
– Lea stuora vahágiin midjiide. Dál lea áigi go álggáše boahtit olu turisttat. Mii fertet geahččalit čoavdit juoga ládje, lohká Sara.
