Norgga luonddudutkaninstituhtta NINA áigu čoaggit 4 200 ealgga, sarvva ja gotti oaivvi muhtin guovlluin gos gozihit, vai besset kártet chronic wasting disease (CWD) Norggas.
Norgga luonddudutkaninstituhtta NINA áigu čoaggit 4 200 ealgga, sarvva ja gotti oaivvi muhtin guovlluin gos gozihit, vai besset kártet chronic wasting disease (CWD) Norggas.
Chronic wasting disease (CWD) lea priondávda mii njoammu sarvaelliid gaskkas (ealga, sarva, vuovderuoigu, goddi, boazu).
Dávda lea gávdnon mannan giđa vuosttaš geardde Sogn ja Fjordanes ovtta gottis, ja das maŋŋel gávdnui vel guovtti ealggas Lulli-Trøndelágas. Dávda ii leat ovdal gávdnon Norggas.
Vuoiŋŋamaččain váldet iskosa
Luonddudirektoráhtta ja Biebmobearráigeahčču čađahit našunála kártema oaidnin dihte lea go dávda leavvan eará báikkiide Norggas.
Vuoiŋŋamaččain šaddet váldit iskosiid, ja kártenbarggus sihtet bivdiid muhtin guovlluin buktit olles oivviid elliin maid leat báhčán bivddus.
– Mii čoaggit badjel 4000 ealga-, sarva-, ja goddeoaivvi maid bivdit leat goddán dábálaš bivdoáigodagas, muitala NINA CWD-prošeaktajođiheaddji Christer M. Rolandsen.
Dušše muhtin guovllut leat mielde
Guovllut gos bivdit šaddet oivviid buktit leat dat guovllut gos dávdda leat gávdnan dán jagi.
Fylkkat gos čađahit kártema leat: Hordalánda, Sogn ja Fjordane, Trøndelága, Nordlánda, Opplánda, Hedemárku, Vestfold/Telemárku ja Oarje-Agder.
– Lea dehálaš diehtit lea go dávda dakkár ahte lea elliid sohkabealis ja makkár agis ealli lea. Buoremus ulbmil čađahit goziheami lea dain suohkaniin gos ovdagihtii lea mearriduvvon man boares elliid oažžu báhčit.
Báikkálaš biebmobearráigeahčut váldet iskosiid vuoiŋŋamaččain, ja oaiveiskkus boahtá lassin dábálaš oaloliskosii, goahte- ja monneravssaid iskosiidda maid muhtin suohkaniin isket.
Lea Veterinearainstituhtta mii analysere iskosiid ja almmuha bohtosiid. Dás oainnát eanet makkár guovlluin áigot váldit iskosiid.
