Gádjunhelikopter, Rukses Ruossa ja eará eaktodáhtolaččat vulge ohcat bivdi davábealde Kárášjoga, ohcanakšuvdna lihkostuvai ja dievdu lei buori vuoimmis go gávdnui.
Finnmárkku politiijat dieđihedje mannan sotnabeaivvi ahte Kárášjogas álggahuvvui ohcanakšuvdna maŋŋel go bivdi ii šat deaivan bivdoskihpáriid lusa.
– Mii oaččuimet dieđu diibmu 16:40 ahte bivdi oktan beatnagiin lei láhppon ja ahte ii šat deaivan bivdoskihpáriid lusa. Dáhpáhus dieđihuvvui Váldogádjunguovddážii ja sihke Rukses Ruossa ja eará eaktodáhtolaččat vulge ohcat bivdi birrasii miilla davábealde Kárášjoga. Dievdu gávdnui diibmu 20:30 ja gádjunhelikopter doalvvui su bivdojoavkku leirii. Bivdi lei buori vuoimmis go gávdnui. Rukses Ruossa áimmahušai dievddu ja čuvvo su mielde leirii, čállet politiijat X/Twitteris.
